Өнгөрсөн долоо хоногийн сүүлээр Киргизстаны нийслэл Бишкек хотод Тусгаар Улсуудын Хамтын Нөхөрлөлийн орнуудын дээд хэмжээний уулзалт зохион байгуулагдаж, ОХУ-ын ерөнхийлөгч Владимир Путин оролцсон юм.

Энэ нь түүний хувьд Гаагын Олон Улсын Эрүүгийн Хэргийн Шүүхээс баривчлах тушаал гарснаас хойших анхны гадаад айлчлал байлаа.

Мөн Уулын Карабахын хямралыг зохицуулж чадаагүй, Украинд эхлүүлсэн дайн нь ахиц муутай байгаа хүнд хэцүү цаг үед хуучин Зөвлөлтийн бүрэлдэхүүнд байсан орнуудад нөлөөгөө хадгалах зорилготой айлчлал байв.

Тиймээс хоёр өдрийн айлчлалын үеэр Путиний аюулгүй байдлыг хангахад Орос, Киргизийн талууд нэлээд өндөр анхаарал тавьсан байна. Пүрэв гарагийн өглөө Путинийг ирэхэд Бишкек хотод үүрэн холбоо болон интернэтийн сүлжээ тасарсан тухай гэрчүүд мэдээлжээ.

Киргизийн үүрэн холбооны нэг оператор тасалдлын шалтгааныг ямар нэг кабель гэмтсэнтэй холбон тайлбарласан байна.

Путинийг тээвэрлэсэн лимузин маш өндөр хамгаалалтын дор нисэх буудлаас Киргизийн ерөнхийлөгчийн ордонд хүрчээ. Энэ үеэр зам дагуу гудамж талбай эзгүйрч, хөл хорьсон байна.

Айлчлалын өдрүүдэд хувийн автомашинаа хэрэглэхгүй байхыг Бишкекийн цагдаагийн газар иргэдэд анхааруулж байжээ.

Мөн гудамжнаас түрээсийн цахилгаан скүүтерүүдийг хураасан байна.

Бүх шатны сургуулиуд, боловсролын байгууллагуудыг Пүрэв, Баасан гарагуудад хааж, хичээлийг нь онлайн горимд шилжүүлжээ.

Тэр ч байтугай Хавдар Судлалын Үндэсний Төвийн хими эмчилгээний тасаг энэ хоёр өдөр ажиллаагүйг өвчтөнүүд мэдээлсэн байна.

Бишкек хотын гудамж талбайнуудад 4,500 цагдаагийн ажилтан 24 цагаар аюулгүй байдлыг хангаж ажилласан тухай Киргизийн хэвлэлүүд мэдээлжээ.

Пүрэв гарагт Киргизийн ерөнхийлөгч Садыр Жапаровтай уулзахдаа Путин түүнд Оросын төрийн хүндэт одон гардуулсан байна.

Мөн тус улсын Кант хотод байдаг Оросын агаарын баазад зочлохдоо алба хаагчдад тус баазын 20 жилийн ойн баярын мэнд хүргэжээ.

Шагналын хариуд Жапаров түүнд киргиз үндэсний гэрийг морины хамт бэлэглэсэн юм.

Баасан гарагийн өглөө Бишкек хотын Ала Арча төрийн ордонд хуучин Зөвлөлтийн бүрэлдэхүүнд байсан орнуудын дээд хэмжээний чуулга уулзалт эхэлжээ.

Чуулганд Оросын ойрын холбоотон долоон улсын төрийн тэргүүн оролцсон юм. Зөвлөлт Холбоот Улс нь Оросыг оролцуулаад нийт 15 бүгд найрамдах улсаас бүрдэж байв.

Энэ удаагийн арга хэмжээнд Арменийн ерөнхий сайд Никол Пашинян оролцоогүй нь анхаарал татаж байлаа.

Уулын Карабахыг Азербайжанд алдсан явдал нь Арменийн эрх баригчдыг уламжлалт холбоотон ОХУ-аас холдоход хүргээд байгаа.

Саяхан Армени улс Гаага дахь Олон Улсын Эрүүгийн Хэргийн Шүүхийн гишүүнээр элссэн юм. Ингэснээр Путинийг нутаг дэвсгэрт нь хүрэлцэн ирвэл баривчлах үүрэг хүлээж байгаа.

Украины дайны үеэр үйлдэгдсэн гэмт хэргүүд, тухайлбал Украины хүүхдүүдийг хулгайлан ОХУ-д шилжүүлсэн хэрэгт Путинийг буруутгасан Олон Улсын Эрүүгийн Хэргийн Шүүх түүнийг баривчлах тогтоол гаргасан юм.

Тус шүүхийг үүсгэн байгуулсан баримт бичиг болох Ромын хэлэлцээрт дэлхийн 123 улс нэгдсэн байдаг.

Эх сурвалж: The Moscow Times