ОХУ-ын сангийн сайд Антон Силуанов
Даваа гарагт парламентынхаа төсвийн байнгын хорооны хуралдаанд оролцохдоо ОХУ-ын сангийн сайд Антон Силуанов тус улсын иргэний зориулалттай дроны хэрэгцээг Хятад улс бүрэн хангадаг тухай ярьжээ.
“Үндсэндээ манай дроны бүх хэрэгцээг БНХАУ хангадаг. Үүнийх нь төлөө бид түншдээ талархаж байна” гэж тэр ярьсан байна.
Силуанов энэ хурлын үеэр Орос улс дотоодын дрон үйлдвэрлэлийн салбарыг хөгжүүлж, 2025 он гэхэд нийт хэрэгцээнийхээ 41 хувийг үйлдвэрлэдэг болох зорилт тавьж байгааг танилцуулжээ.
Энэ зориулалтаар 2024 оны улсын төсөвт 60 гаруй тэрбум рублийн ($617 сая) хөрөнгө тусгах санал оруулсан байна.
Украины дайнтай холбоотой Өрнөдийн эдийн засгийн хоригийн улмаас ОХУ иргэний болон цэргийн зориулалттай дрон (нисгэгчгүй онгоц) импортлоход хэцүү болоод байгаа.
Одоо энэ талын нийлүүлэлт нь Хятад улсаас ихээхэн хамааралтай болсон юм.
ОХУ-ын ерөнхийлөгч Владимир Путин өнөөдөр “Бүс ба Зам” санаачилгын дээд чуулганд оролцохоор Бээжин хотод хүрэлцэн ирж байгаа. Тэрбээр энэ үеэрээ Хятадын төрийн тэргүүн Ши Жиньпинтэй хоёр орны хамтарсан төслүүдийн талаар ярилцах төлөвлөгөөтэй байна.
Айлчлалынхаа өмнө тэр Даваа гарагт Хятадын төв телевизийн сувагт ярилцлага өгсөн юм.
Энэ үеэр Путин энхийн арга замаар Украины хямралыг шийдвэрлэх Хятадын засгийн газрын санал санаачилга үндэслэл сайтайг онцолж, ийм яриа хэлэлцээнээс зайлсхийж буй Киевийн эрх баригчдыг шүүмжилжээ.
Гаага дахь Олон Улсын Эрүүгийн Хэргийн Шүүх өөрийг нь баривчлах тогтоол гаргаснаас хойш Путин хоёр дахь улсдаа айлчилж байна. Тэрбээр өнгөрсөн долоо хоногт Киргизстанд айлчилсан юм.
Олон Улсын Эргүүгийн Хэргийн Шүүхийг үүсгэн байгуулсан суурь бичиг баримт болох Ромын гэрээнд Хятад улс нэгдээгүй байдаг тул Путинийг баривчлах үүрэг хүлээдэггүй юм байна.
Эх сурвалж: DPA
