АНУ-ын ерөнхийлөгч Жо Байден маргааш буюу Лхагва гарагт Израиль, Йордан улсуудад айлчлахаар болжээ.
Тэрбээр Хамас-Израилийн дайныг бүс нутгийн хэмжээний мөргөлдөөн болж өргөжихөөс сэргийлэхийн тулд Израиль, Арабын удирдагчидтай уулзахаар төлөвлөсөн байна.
Ойрх Дорнодод дайн эхэлсний дараа АНУ-ын засаг захиргаа Израильд үзүүлэх зэр зэвсгийн тусламжаа нэмэгдүүлснээс гадна Газрын дундад тэнгисийн зүүн хэсэгт нисэх онгоц тээвэрлэгч хоёр хөлгөө байрлуулаад байгаа.
Байдены айлчлал нь Израиль улсыг АНУ тууштай дэмжих баталгаа болох юм.
АНУ-ын төрийн нарийн бичгийн дарга Энтони Блинкен долоон цаг гаруй хугацаанд Израилийн удирдлагуудтай ярилцсаны дараа өнөөдөр өглөө Байдены айлчлалын товыг зарласан байна.
Үүний дараа Цагаан ордноос Байдены айлчлал Йордан улсад үргэлжилж, тус улсын хаан Абдуллах, Египетийн ерөнхийлөгч Абдел Фаттах эль Сисси, Палестины ерөнхийлөгч Махмуд Аббас нартай уулзахаар болсныг мэдээлжээ. Энэ үеэр Газын зурваст хүмүүнлэгийн тусламж саадгүй үзүүлэх асуудлыг хэлэлцэх гэнэ.
“Газын зурваст хүмүүнлэгийн тусламж тасралтгүй хүрэх зайлшгүй шаардлагатайг бид ойлгож байгаа. Энэ бол ерөнхийлөгч Байден болон нийт засаг захиргааны хөдөлшгүй байр суурь юм” гэж Цагаан ордны үндэсний аюулгүй байдлын зөвлөлийн төлөөлөгч Жон Кирби энэ үеэр мэдэгдсэн байна.
Ундны ус, хоол хүнс, эрчим хүчний үүсгүүрт ашиглах түлш шатахуун ачсан тусламжийн цуваа одоо Египетийн хил дээр саатаад байгаа юм.
Израилийн арми Хамас зэвсэгт байгууллагыг бүрэн устгах зорилгоор Газын зурвасыг гадаад ертөнцөөс тусгаарлаж, бүх хил хязгаарыг нь битүүмжлээд байна.
Эх сурвалж: Associated Press
