Мягмар гарагт Газын зурвас дахь нэг эмнэлэг агаарын цохилтод өртсөний улмаас 500 орчим хүн амиа алдсаныг Палестины тал мэдээллээ.
Аравдугаар сарын 7-нд Хамас-Израилийн дайн эхэлснээс хойш нэг дор ийм олон хүн амиа алдсан эмгэнэлт үйл явдал тохиолдож байгаагүй юм.
Эмнэлгийг бөмбөгдсөн үйлдэлд Израиль болон Хамасын талууд харилцан нэг нэгнээ буруутгаж байна.
Тухайлбал Израилийн армийн агаарын цохилтод эмнэлэг өртсөн гэж Хамасын тал мэдээлж байгаа бол Хамасын харвасан пуужинд алдаа гарснаас эмнэлэг оногдсон гэж Израилийн тал тайлбарлажээ.
Одоогоор талуудын мэдэгдлийг гуравдагч эх сурвалжаар батлах боломжгүй байна.
Хамасын засгийн газрын эрүүл мэндийн яам эмнэлэгт амь үрэгдсэн хүний тоог 500 гэж мэдээлсэн бол иргэний хамгааллын сайд нь 300 гэж мэдээлжээ.
Энэхүү эмгэнэлт явдлаас өмнө 11 өдөр үргэлжилсэн Израилийн агаарын цохилтод нийтдээ 3,000 орчим хүн амиа алдсаныг Палестины тал мэдээлж байв.
“Манай хийсэн дүн шинжилгээгээр Газа хотын Аль-Ахли эмнэлэг дэлбэрэх үед террористууд эмнэлэгт ойрхон газраас пуужингуудыг харваж байсан нь тогтоогдсон. Бидний олж авсан тагнуулын мэдээллээр бол Исламын Жихад бүлгийн харвасан пуужин бүтэлгүйтсэний улмаас Газын эмнэлэг оногдсон байна” гэж Израилийн Батлан Хамгаалах Хүчин мэдэгджээ.
Хамасын салбар Исламын Жихад зэвсэгт бүлгийн төлөөлөгч Дауд Шехаб “Энэ бол огт худал, зохиомол тайлбар. Энгийн иргэдийн эсрэг үйлдсэн аймшигт гэмт хэрэг, алан хядлагаа эзлэн түрэмгийлэгчид нуун далдлахыг оролдож байна” гэж хариу мэдэгдсэн байна.
Бөмбөгдөлтөд аль ч тал буруутсан энэ үйл явдал дайны галыг намжаах хүчин чармайлтад томоохон саад учруулах нь тодорхой боллоо.
Тухайлбал энэхүү бөмбөгдөлтийн дараа Палестины ерөнхийлөгч Махмуд Аббас АНУ-ын ерөнхийлөгч Жо Байдентай хийх уулзалтаа цуцалсан байна.
Уулзалт өнөөдөр Йорданд болох байсан бол Аббас өөрийн албан өргөө байрладаг Палестины эзлэгдсэн газар нутгийн Рамаллах хот руу буцсаныг Палестины албаны эх сурвалж мэдээлжээ.
Эх сурвалж: Reuters