Украины талаас яаралтай нийлүүлэхийг хүсэж байсан алсын тусгалтай пуужинг илгээхээр болсноо АНУ-ын ерөнхийлөгч Жо Байден өнгөрсөн сард мэдэгдэж байв.
Тэгвэл энэ зэвсгийг Украины арми хүлээж авсан нь өчигдөр тодорхой болжээ. Тухайлбал өчигдөр Украины арми анх удаагаа ATACMS пуужинг Оросын хүчний эсрэг хэрэглэснээ баталсан байна.
“Өнөөдөр би АНУ-д талархлаа илэрхийлмээр байна. Ерөнхийлөгч Байдентай тохиролцсон зүйл маань хэрэгжлээ. ATACMS пуужин маш өндөр нарийвчлалтайгаа батлан харууллаа” гэж Украины ерөнхийлөгч Володимир Зеленский өчигдөр оройн мэдэгдэлдээ өгүүлжээ.
ATACMS (Army Tactical Missile System) хэмээх энэхүү орчин үеийн зэвсгийг Украинд нийлүүлэх үйл явц маш нууц байдалд хэрэгжиж, анх удаа хэрэглэснийх нь дараа л ийнхүү нийтэд ил болж байна.
Гэхдээ мөргөлдөөнийг гүнзгийрүүлэхээс болгоомжилсон АНУ-ын засаг захиргаа Украинд илгээсэн ATACMS пуужингийнхаа боломжит тусгалын зайг нь хязгаарласан тухай эх сурвалжууд мэдээлжээ.
Тухайлбал ийм зэвсгийн дээд зай 300 км хүрдэг бол Украинд илгээсэн хувилбар нь энэ хэмжээнд хүрэхгүй юм байна. Гэхдээ харвасан нэг цэнэгт хошуу нь олон зуун бөмбөг болж задардаг хувилбарыг илгээсэн тухай мэдээлжээ.
ATACMS-ийг анх удаа ашиглахдаа зүүн болон өмнөд фронтын ар талын хоёр нисэх буудалд цохилт өгч, Оросын армийн есөн нисдэг тэрэг, бусад зэвсэг техник, хүн хүчийг устгаснаа Украины тусгай ажиллагааны хүчин мэдээлсэн байна.
Хэдийгээр ATACMS-ийн хязгаарлагдмал тусгалтай хувилбарыг илгээсэн ч энэ зэвсгээр Украины арми Бердянск дахь Оросын агаарын томоохон баазад цохилт өгөх чадвартай болсон гэж ажиглагчид үзэж байна.
Бердянскийн баазад хамгийн ойр Украины цэргийн байрлал нь Днепр мөрний баруун эрэг бөгөөд хоорондын зай нь ердөө 160 км орчим юм.
ATACMS бол АНУ-аас Украинд нийлүүлсэн хамгийн алсын тусгалтай зэвсэг. Киевийн эрх баригчид ийм зэвсэгтэй болох хүсэлтээ эртнээс илэрхийлж байсан ч Оросын газар нутгийн гүнд цохилт өгөхөөс болгоомжилсон Байдены засаг захиргаа шийдэж чадалгүй хүлээлгэж байжээ.
Өнгөрсөн сард Зеленскийг АНУ-д айлчлах үеэр шийдвэр гарч байв.
Гэхдээ хэдэн ширхэг ATACMS өгч буй талаар мэдээллийг талууд чанд нууцалж байна.
Эх сурвалж: Associated Press
