Бээжин хотод хоёр өдөр үргэлжилсэн “Бүс ба зам” дэд бүтцийн санаачилгын дээд хэмжээний чуулган өндөрлөлөө.

Энэ үеэр Монгол улсын нутгаар дайран өнгөрөх байгалийн хий дамжуулах хоолойн “Сибирийн Хүч-2” төслийг эхлүүлэх тохиролцоо Орос, Хятадын удирдагчдын хооронд хийгдэж болзошгүй гэсэн хүлээлт байсан юм.

Сүүлийн долоон жилийн турш яригдаж байгаа энэ төслийг эхлүүлэх эсэх нь гол худалдан авагч Хятад улсын шийдвэрээс хамаарна.

Тэгвэл чуулганы үеэр энэ төсөлтэй холбоотой ямар ч мэдээлэл гарсангүй. Оросын зарим хэвлэлүүд Путинийг Бээжингээс гар хоосон буцсан тухай бичсэн байна.

ОХУ-ын ерөнхийлөгч Путин энэ арга хэмжээнд маш хүчирхэг бүрэлдэхүүнтэй ирсэн юм. Тэрбээр Хятадын төрийн тэргүүн Ши Жиньпинтэй өчигдөр гурван цагийн турш уулзсан бөгөөд төлөөлөгчдийн бүрэлдэхүүнд нь эрчим хүчний асуудал эрхэлсэн шадар сайд Александр Новак, Газпром компанийн тэргүүн Алексей Миллер, Роснефтийн ерөнхийлөгч Игорь Сечин нар багтаж байжээ.

Уулзалтын дараа Путин өчигдөр орой хэвлэлийн хуралд оролцохдоо төслийн талаар ямар нэг мэдээлэл өгөөгүй юм. Кремлийн хэвлэлийн төлөөлөгч Дмитрий Песков бас сэтгүүлчидтэй уулзахдаа уг төслийн хүрээнд “ямар нэг бичиг баримтад гарын үсэг зурахгүй” гэж ярьсныг ТАСС агентлаг мэдээлжээ.

“Сибирийн Хүч-2” нь Оросын эрх баригчдын хувьд амин чухал төсөл бөгөөд Украины дайны улмаас алдсан Европын зах зээлийн алдагдлаа нөхөхөд чухал ач холбогдолтой байгаа.

2019 онд ашиглалтад орсон “Сибирийн Хүч-1” хоолойгоор Хятадын зах зээлд энэ онд 22 тэрбум шоо метр хий нийлүүлж байгаа ажээ.

Гэхдээ энэ нь Европын Холбооны зах зээлд нийлүүлдэг байсан хийн хэмжээний наймны нэг орчим юм. Европын зах зээлд жил бүр 180 тэрбум шоо метрийг нийлүүлдэг байжээ.

Оросын тал шинэ дамжуулах хоолойгоор нийлүүлэх хийн үнийг Европын Холбоо болон Туркийн чиглэлийн тарифаасаа бараг хоёр дахин буулгах санал тавьсан юм байна. Харьцуулбал мянган шоо метр нь Европт $481.7 байсан бол Хятадад $271.6-г санал болгожээ.

Гэхдээ энэ том хямдралаас болоод Путиний "дайныг санхүүжүүлэгч" гэсэн нэр зүүхийг Хятадын тал хүсээгүй гэж ажиглагчид үзэж байна.

Хямд тарифаар татаж чадсан ч шинэ хоолойн бүтээн байгуулалт доод тал нь 10 жил үргэлжлэх бөгөөд энэ хооронд Европын зах зээлийн алдагдал нөхөгдөхгүй хэвээр үргэлжлэхийг “RusEnergy” зөвлөх компанийн мэргэжилтэн Михаил Крутихин бичжээ.

Эх сурвалж: Moscow Times