Газын зурвасын хил дээр байрлаж буй цэргүүдтэйгээ өчигдөр уулзахдаа Израилийн батлан хамгаалахын сайд Йоав Галлант тэднийг Палестины нутаг дэвсгэрийг тун удахгүй “дотроос нь харах” тухай ярьжээ.

“Та бүхэн одоо Газыг гаднаас нь харж байгаа бол тун удахгүй дотроос нь харах болно. Удахгүй тушаал өгнө” гэж сайд хэлсэн байна.

Галлантын энэ мэдэгдлийн дараахан Израилийн ерөнхий сайд Бенжамин Нетаньяху цэргүүдтэй хамт зогсоод ялалт байгуулахаа амлаж буйг харуулсан дүрс бичлэгийг цацсан юм.

“Хамгийн муу зүйл ойрхон ирснийг харуулсан бүх шинж тэмдэг бүрдлээ” гэж Йорданы гадаад хэргийн сайд Айман Сафади өчигдөр нийслэл Амман хотод сэтгүүлчидтэй уулзахдаа эдгээрийг дүгнэн хэлжээ.

Аравдугаар сарын 7-ны өдөр Хамасын зэвсэгт дайчид Израилийн нутаг дэвсгэрт гэнэдүүлэн халдсанаас хойш палестинчуудын газар нутгийн нэг хэсэг болох Газын зурвас өдөр алгасалгүй бөмбөгдүүлж байгаа.

Мөргөлдөөнийг бүс нутагт өргөжүүлэхээс сэргийлэх зорилгоор АНУ-ын ерөнхийлөгч Жо Байден саяхан Израильд айлчилсан бол маргааш нь буюу өчигдөр Их Британийн ерөнхий сайд Риши Сунак мөн айлчлан очсон байна.

Тэрбээр Саудын Арабын угсаа залгамжлах хунтайж Мохаммед бин Салмантай бас уулзжээ.

Газын зурвасыг хяналтдаа байлгадаг Хамас байгууллага халдлагынхаа үеэр Израилийн 200 орчим иргэнийг барьцаалсны 30 орчим нь хүүхэд, 20 орчим нь 60-аас дээш насны хүмүүс байгаа гэсэн мэдээлэл бий.

Израилийн эрх баригчид иргэдээ чөлөөлөхөөс нааш Газын зурваст ямар ч хангамж нэвтрүүлэхгүйгээ мэдэгдэж, 2.3 сая оршин суугчийг нь гадаад ертөнцөөс таслан битүүмжлээд байна.

Мягмар гарагт Газын зурвасын Аль Ахли Араби эмнэлэг бөмбөгдөлтөд өртөх үеэр олон зуун энгийн иргэн алагдсан нь нөхцөл байдлыг улам хурцатгаад байгаа.

Палестины эрх баригчид энэ бөмбөгдөлтийн үеэр 471 хүн алагдсан гэж мэдээлж байна. Харин Израилийн гадаад хэргийн яам хэдэн арваар тоологдох хүний амь үрэгдсэн гэж мэдээлжээ.

Хамасын тал эмнэлгийг Израилийн арми бөмбөгдсөн гэж мэдэгдэж байгаа. Эмнэлгийн ойролцоо пуужин харваж байсан Исламын Жихад бүлэг алдаа гаргаснаас ийм эмгэнэлт явдал тохиолдсон гэж Израилийн тал тайлбарлаж байна.

Байдены айлчлалын ганц үр дүн нь Египетийн талаас Газын зурваст хязгаарлагдмал хэмжээний хүмүүнлэгийн тусламж нэвтрүүлэхийг Израилийн засгийн газар зөвшөөрсөн явдал байлаа.

Хүмүүнлэгийн тусламж тээвэрлэсэн нийтдээ 100 гаруй ачааны автомашин одоо Египетийн хилийн боомт дээр хүлээж байгаа.

Тэдгээрээс 20 автомашиныг л нэвтрүүлэхээр Египет, Израилийн талууд тохиролцоод байна.

Газын зурвасаас гадна Израилийн бусад хил дээр ч нөхцөл байдал улам бүр хүндэрч байна.

Өчигдөр Ливаны Хезболлах зэвсэгт бүлэг Манара тосгоны ойролцоох Израилийн цэргийн байрлалд пуужингаар цохилт өгснөө мэдээлжээ. Израилийн арми хариуд нь Ливаны хилийн бүс нутаг дахь байрлалууд руу их буугаар гал нээсэн байна.

Энэ нь Хезболлах-Израилийн хооронд сүүлийн 17 жилийн хугацаанд гарсан хамгийн том мөргөлдөөн юм.

Үүнээс гадна Палестины газар нутгийн нөгөө нэг хэсэг болох Йордан голын Баруун эрэг мөргөлдөөний гурав дахь фронт болж магадгүй байна.

Өчигдөр энэ бүс нутгийн Тулкарм хотын ойролцоох Нур Шамс дүрвэгсдийн хуаранд Израилийн зэвсэгт хүчинтэй мөргөлдөөн гарсны улмаас 12 палестин хүн алагджээ.

Өчигдөр бас Ойрх Дорнодын бүс нутагт байрлаж буй АНУ-ын байлдааны хөлөг Йемений Хусит босогчдын зүгээс Израилийн чиглэлд харвасан байж болзошгүй гурван далавчит пуужин, хэд хэдэн дроныг устгасан тухай Пентагон мэдээлсэн байна.

Йемений хууль ёсны засгийн газрыг унагаж, ихэнх газар нутгийг хяналтдаа авсан Хусит хөдөлгөөнийг Ираны эрх баригчид дэмждэг юм.

Хамасын эрх баригчид өнөөдөр буюу Баасан гарагт Израилийн эсрэг нэгдсэн тэмцэл өрнүүлэхийг нийт Арабын болон Исламын ертөнцийн улс орнуудад өчигдөр уриалжээ.

Израилийн армийн Газын зурваст явуулж буй агаарын довтолгооны үеэр нийтдээ 3,500 гаруй хүн алагдаж, 12,000 гаруй хүн шархадсан гэх сүүлийн тоо баримтыг Палестины эрүүл мэндийн албаныхан өчигдөр зарласан байна.

Газын зурвасын хүн амын тал орчим хувь нь орон гэргүй болсныг НҮБ бас мэдээлжээ.

Эх сурвалж: Reuters