Карибын тэнгисийн улс орнууд Европын Холбооны нутаг дэвсгэрт визгүй зорчдог давуу талаа “алтан паспорт” нэрийн дор гадаадын иргэдэд худалддаг асуудалд Брюсселийн эрх баригчид анхаарлаа хандуулжээ.
Лхагва гарагт Европын комисс энэхүү наймааны тоо баримтыг анх удаа бодитой харуулсан судалгааны тайланг танилцуулсан байна.
Карибын тэнгисийн таван улс нийтдээ 88,000 орчим хүнээс өндөр төлбөр авч иргэнээ болгожээ. Тэдгээрийн дотор Орос, Хятад, Иран зэрэг улсуудын иргэд олон байгаа нь Европын Холбооны эрх баригчдын санааг зовоож байна.
Карибын орнуудын “алтан паспорт”-ыг авах үнэ хамгийн багадаа $100,000-аас эхэлдэг гэнэ.
Ердөө 70,000 гаруй хүн амтай Доминика улс 34,500 паспорт зарсныг дээрх судалгаанд дурджээ. Тус улсын эрх баригчид өмнө нь үүнээс дөрөв дахин бага тоог зарлаж байсан юм.
Сэйнт Киттс ба Невис улс 48,000 орчим хүн амтай ч гадаадын иргэдэд 36,700 паспорт заржээ.
Антигуа ба Барбуда, Гренада, Сэйнт Киттс ба Невис, Сэйнт Луси, Доминика таван улс нийлээд 88,000 паспортыг өндөр үнээр гадаадын иргэдэд заржээ.
Дээрх улсуудын иргэд Европын Холбооны гишүүн орнуудад нэг жилийн дотор 90 хүртэл хоногийн хугацаагаар визгүй зорчих эрхтэй байдаг юм.
Европын Комисс үүнийг зохион байгуулалттай гэмт хэргийн үйл ажиллагаа, мөнгө угаалт, татвараас зайлсхийх зэрэгт ашиглаж байж болзошгүй гэж үзээд хязгаарлах арга хэмжээг төлөвлөж эхэлжээ.
Тухайлбал паспорт олгосон улстай ямар нэг бодитой хэлхээ холбоогүй иргэдийг визгүй нэвтрүүлэхээс татгалзах зэрэг арга хэмжээг хуульчлах талаар хэлэлцэж эхэлсэн байна.
Жишээлбэл Доминика улс өөрийнх нь нутаг дэвсгэрт оршин суудаггүй, бүр ганц ч удаа хөл тавьж байгаагүй гадаадын иргэдэд “алтан паспорт”-аа зардаг юм.
Мөн ийм паспортыг ашиглан Европын орнуудад цагаачлах арга зам бий болсон байна.
Тухайлбал визгүй нөхцөлөөр Европын Холбоонд ирсэн 150,000 орчим хүн байнга оршин суух, цагаачлах хүсэлт гаргасныг тайланд дурджээ.
Карибын орнуудын “алтан паспорт”-ыг авсан гадаадын иргэдийн ихэнх нь Хятад, Орос, Сири, Иран, Ирак, Йемен, Нигери, Ливи зэрэг авлигын түвшин өндөр улс орнуудын иргэд байсан байна.
“Европын Холбоонд визгүй зорчих эрх нь наймаалцаж болдог арилжааны хэрэгсэл байж болохгүй” гэж дээрх тайланд дүгнээд хуулийн цоорхойг нөхөх арга хэмжээ авахыг эрх баригчдад зөвлөжээ.
Эх сурвалж: The Guardian
