Газын зурваст барьцаанд байсан өндөр настан хоёр эмэгтэйг Даваа гарагт Хамасын тал Израильд хүлээлгэж өгснөөр нийт суллагдсан хүний тоо дөрөв болжээ.

85 настай Ёшевед Лифшиц, 79 настай Нурит Купер нарыг Палестины зэвсэгт байгууллага Израилийн талд шилжүүлж өгснийг олон улсын Улаан Загалмайн нийгэмлэг баталсан байна.

Хоёр эмэгтэйг аравдугаар сарын 7-ны өдөр Газын хилийн ойролцоох Нир Оз киббуцээс (фермерийн хамтарсан аж ахуй) нөхрүүдийнх нь хамт олзолж байжээ.

Хамас тэдний нөхрүүдийг барьцаанд үлдээсэн байна.

Хүмүүнлэг ёсны учир шалтгаанаар барьцааны хоёр хүнийг сулласнаа Хамасын албаныхан тайлбарлажээ. Өнгөрсөн долоо хоногт тус байгууллага АНУ-ын иргэн ээж, охин хоёрыг сулласан юм. Газын зурваст нийтдээ 220 орчим хүн барьцаанд байгаа гэж Израилийн тал үзэж байна.

Израилийн эрх баригчид өчигдөр 1965 онд төрсөн Палестины хоригдол эрүүл мэнд нь муудсаны улмаас шоронгийн эмнэлэгт нас барсныг мэдээлсэн юм.

Дараа нь Хамас байгууллага түүнийг эзлэгдсэн Баруун эргийн Тубас хот дахь Палестины Исламист бүлгийн тэргүүн, 58 настай Омар Дарагмех байсныг баталжээ. Израилийн тал түүний амийг санаатай хөнөөсөн гэж үзэж байгаагаа Хамас мэдэгдсэн байна.

Израилийн арми одоо Газын зурваст цэрэг оруулж, хуурай замын байлдааны ажиллагаа явуулахаар бэлдэж байгаа.

АНУ-ын засаг захиргаа илүү олон барьцааны хүмүүсийг суллуулахын тулд уг ажиллагаагаа хойшлуулахыг Израилийн талд уриалжээ.

Хэрвээ хуурай замын байлдааны ажиллагаа эхлүүлбэл бүс нутаг дахь Ираны дэмжлэгтэй зэвсэгт бүлэглэлүүд Израилийн эсрэг шинэ фронт нээхээ анхааруулж байна.

Израилийн тал сүүлийн өдрүүдэд Газын зурваст өгөх агаарын цохилтоо эрчимжүүлж байгаа. Даваа гарагийн байдлаар уг ажиллагааны улмаас амиа алдсан палестин хүний тоо 5,000 болж нэмэгджээ. Эдгээрийн 2,000 гаруй нь хүүхэд байна.

Даваа гарагт Египетийн талаас Газын зурваст тусламжийн бараа ачсан гурав дахь хэсэг цуваа нэвтэрчээ.

Гэхдээ тусламжийн ачаанд түлш шатахуун оруулахыг Израилийн эрх баригчид хориглож буй тул зөвхөн хоол хүнс, ундны ус, эм, эмнэлгийн хэрэгсэл багтаж байна.

АНУ-ын үндэсний аюулгүй байдлын зөвлөлийн төлөөлөгч Жон Кирби өчигдөр хэвлэлд ярихдаа мөргөлдөөн бүс нутагт өргөжихөөс болгоомжилж буй ч гал зогсоох талаар ярихад эрт байгааг илэрхийлжээ.

“Яг одоо гал зогсоох цаг биш гэж бид үзэж байна. Израиль улс өөрийгөө хамгаалах эрхтэй. Тэдэнд Хамасын удирдлагуудтай тооцоо бодох ажил байгаа” гэж тэр CNN сувагт ярьсан байна.

Даваа гарагт Египетийн боомтоор Газын зурваст 20 ачааны автомашинтай тусламжийн цуваа нэвтэрсэн нь юм.

Гэхдээ энэ нь дайн эхлэхээс өмнө Газын зурвасын гаднаас авдаг байсан өдөр тутмын импортын 4 орчим хувьтай тэнцэж байгааг НҮБ мэдээлжээ.

Газын зурвасын 2.3 сая хүн амын 1.4 сая нь орон гэрээсээ дайжсаны 580,000 орчим нь НҮБ-ын ажиллуулдаг сургуулиудын байранд толгой хоргодож байгааг тус байгууллага бас мэдээлсэн байна.

Эх сурвалж: Associated Press