Германы канцлер Олаф Шольц, Японы ерөнхий сайд Фүмио Кишида нар
Япон улсын нэрлэсэн Дотоодын Нийт Бүтээгдэхүүний (nominal GDP) хэмжээ 2023 онд буурч, дэлхийн улс орнуудын жагсаалтад гуравдугаар байраас дөрөвдүгээр байр руу ухрах тооцоог Олон Улсын Валютын Сан (ОУВС) гаргасан байна.
Ингэснээр Герман улсын ард эрэмбэлэгдэх болж байгаа юм.
Үүнд инфляцын өсөлт нөлөөлсөн гэж судлаачид үзэж байна. Тухайлбал Япон улсад инфляцын хэмжээ сүүлийн нэг жилийн хугацаанд 3 орчим хувиар өсжээ. Германд оны эхээр 9 хувь байсан бол аажим буурсаар есдүгээр сард 4 хувьд хүрсэн байна.
Цаашдаа нэрлэсэн ДНБ-ий хэмжээгээр 2026 онд Энэтхэг улс Японыг гүйцэх тооцоог ОУВС гаргажээ.
Саяхан хүн амын тоогоор Хятад улсыг гүйцсэн Энэтхэг улс ДНБ-ийн хэмжээгээр 2026 онд дэлхийд дөрөвдүгээрт, 2027 онд гуравдугаарт жагсах төлөвтэй байгаа юм байна.
Япон улсын хувьд 1968 онд тухайн үеийн хэмжүүрээр Баруун Германыг эдийн засгийн хүчин чадлаар гүйцэж, дэлхийд зөвхөн АНУ-ын дараа хоёрдугаарт жагсах болсон юм.
2010 онд Хятад улсын өсөлт Японыг гуравдугаар байрт ухрааж байжээ.
ОУВС-ийн гаргасан тооцооллоор 2023 оны сүүлээр Япон улсын нэрлэсэн ДНБ-ий хэмжээ өмнөх оноос 0.2 хувиар буурч, $4.23 их наядад хүрэх бол Герман улсын энэ үзүүлэлт 8.4 хувиар өсөж, $4.43 их наядад хүрэх гэнэ.
Эх сурвалж: Kyodo News
