МАХАЧКАЛА, 2023 оны аравдугаар сарын 30 /DW/. "Вагнер" цэргийн хувийн компанийн 170 гаруй дайчин Чеченийн "Ахмат" тусгай отрядын бүрэлдэхүүнд орсон тухай тус бүгд найрамдах улсын тэргүүн Рамзан Кадыров мэдээлжээ.
Ийнхүү тэрбээр тус нэгтгэл ангийн командлагч Апта Алаудиновын хэлснийг баталсан боловч вагнерчуудын тоог тодорхой дурдсангүй. “Вагнер”-ийн хуучин дайчид “Ахмат” тусгай хүчний ангиуд руу шилжиж байна гэж тусгай хүчний командлагч Апта Алаудинов урд өдөр нь мэдээлсэн юм.
“Вагнер” цэргийн хувийн компанийн хуучин дайчид “АХМАТ” элит тусгай хүчинд алба хаахаар шилжиж байна. Манай ангийн эгнээнд үргэлжлүүлэн алба хаах хүсэлтэй байгаагаа илэрхийлсэн дараагийн дайчдын бүлэгт Донбасс, Украинд болон бусад халуун цэгүүдэд байлдаж байсан арвин туршлагатай 170 гаруй цэрэг байна " гэж Кадыров Телеграм сувагтаа бичжээ.
Мөн “Вагнер”-ийн бусад хуучин дайчид нөхдийнхөө үлгэр жишээг дагаж, “Ахмат” тусгай хүчний эгнээнд нэгдэнэ гэдэгт итгэлтэй байгаагаа Чеченийн тэргүүн илэрхийлсэн байна.
Д.Жаргал
Эх сурвалж: "Монцамэ" агентлаг
