Исламын радикал үзэлтэй Оросын 39 иргэнийг албадан гаргахаар төлөвлөж байгаагаа Франц улсын дотоод хэргийн сайд Жеральд Дарманен өчигдөр хэвлэлд ярьжээ.
Аравдугаар сарын 13-ны өдөр Францын хойд бүсийн нэг хотын дунд сургуульд гарсан зэвсэгт халдлагын дараа эрх баригчид Оросын харьяат иргэдэд тавих хяналтаа чангатгасныг сайд ярьсан байна. Уг аллагыг үйлдсэн этгээд нь ОХУ-ын Ар Кавказын бүс нутаг Ингушетээс гаралтай хүн байсан юм.
“Бид өнгөрсөн хугацаанд Оросын харьяат 39 хүний жагсаалтыг гаргалаа. Тэднийг радикал үзэл сурталд автсан гэж үзээд онцгойлон хянаж байгаа” гэж Дарманен ярьжээ.
Тэдгээрийг албадан буцаахын тулд Оросын талтай зөвшилцөх ёстой юм байна.
“Өнгөрсөн долоо хоногт бид жагсаалтаа Оросын эрх баригчдад өгсөн. Одоо шаардлагатай яриа хэлэлцээг эхлүүлэх болно” гэж сайд тайлбарлажээ.
Хамас-Израилийн дайн эхэлснээс хойш Франц улсад исламын радикал үзэлтнүүд идэвхжиж эхэлсэн юм. Өнгөрсөн долоо хоногт Парис хот дахь Израилийн элчин сайдын яаманд халдахаар бэлдэж байсан гэх дөрвөн өсвөр насны залууг Францын хууль хүчнийхэн баривчилсан байна. Тэдгээрийн гурав нь Оросын Ар Кавказын бүс нутаг Чечень, Ингушетээс гаралтай хүмүүс байжээ.
Албадан гаргахаар төлөвлөж буй 39 хүний дотор дээрх гурван залуу багтсан эсэх нь тодорхойгүй байна.
Эх сурвалж: AFP
