Мягмар гарагт Израилийн армийн нисэх онгоц Газын зурвас дахь хамгийн том дүрвэгсдийн хуаранг бөмбөгдсөний улмаас олон хүний амь үрэгджээ.
Газын хойд хэсэгт оршдог Жабалиа хуаранг агаараас довтолсноо Израилийн тал хүлээн зөвшөөрсөн байна. Уг цохилтын үр дүнд Хамасын дээд командлагчдын нэг алагдаж, тус байгууллагын газар доор байгуулсан хонгилын дэд бүтэц нурсныг бас мэдээлжээ.
Хамасын албаныхан бөмбөгдөлтийн үеэр амиа алдсан хүний тоог хамгийн цөөндөө 50 гэсэн бол Улаан Хавирган Сар нийгэмлэг 25 гэж мэдээлж байна.
Жабалиа хуарангаас ирсэн гэрэл зурагт бөмбөгдөлтөөс үүссэн асар том тогоо, нурсан барилга байгууламж зэрэг харагдаж байна.
Сүүлийн нэг хоногийн хугацаанд Газын зурваст явуулсан агаарын болон хуурай замын байлдааны ажиллагаагаар Хамасын 300 байрлалыг цохисноо Израилийн зэвсэгт хүчин Мягмар гарагийн өглөө мэдээлжээ.
Өчигдөр бас Йемен улсын засгийн эрхийг булаасан Хусит босогчид Израиль улсын зүг олон тооны баллистик пуужин, нисгэгчгүй онгоц харваснаа зарласан юм.
Арабын хойгийн өмнөд хэсгийн Йемен улс нь Израилийн хилээс 2,000 гаруй километр зайтай оршдог бөгөөд Хусит зэвсэгт хөдөлгөөнийг Иран улсын эрх баригчид санхүүжүүлдэг.
Аравдугаар сарын 7-нд Палестины Хамас зэвсэгт байгууллага Израилийн нутаг дэвсгэрт гэнэдүүлэн халдах үеэр 1,400 орчим хүн алагдаж, 239 хүн барьцаалагдсан юм.
Үүний дараа Израилийн арми Газын зурвасыг тасралтгүй бөмбөгдөж, явган цэргийн хүчээ нэвтрүүлээд байна. Өнгөрсөн хугацаанд Газын зурваст нийтдээ 8,500 гаруй хүн алагдсаныг Хамасын эрх баригчид өчигдөр мэдээлжээ.
Эх сурвалж: BBC