Одоогоос нэг жил орчмын өмнө дэлхийн тэргүүн баян Илон Маск томоохон сошиал платформ Твиттерийг (одоо X гэж нэрлэдэг болсон) $44 тэрбумаар худалдан авч байв.
Энэ долоо хоногийн Даваа гарагт тус компанийн дотроос задарсан хувьцааны үнэ ханшийн тухай мэдээллээр бол өнөөдөр X компанийн зах зээлийн үнэлгээ $19 тэрбум болсон байна.
Өөрөөр хэлбэл өнгөрсөн нэг жилийн хугацаанд X компанийн зах зээлийн үнэлгээ 55 хувиар ($25 тэрбумаар) унажээ.
Энэ нь долоо хоног бүр $480 саяар, өдөр бүр $68 саяар үнэ цэнээ алдсан гэсэн үг юм.
Өнгөрсөн нэг жилийн хугацаа тус компанийн хувьд маш их үймээн самуунтай, ороо бусгаа цаг үе байв.
Шүүхэд хэд хэдэн удаа дуудагдаж, хэрэглэгчид болон зар сурталчилгааны харилцагчид нь цөөрч, техникийн алдаа доголдол олон удаа давтагджээ.
Мөн агуулгын хяналт нь суларч, худал хуурмаг мэдээлэл, ёс бус үг хэллэг, буруу үзэл номлол түгээсэнд буруутгагдаж байгаа.
Илон Маск худалдаж авсан компанийнхаа ашигтай ажиллагааг сайжруулахын тулд бизнес загварыг нь өөрчлөх тухай ярьж, зарим туршилтуудыг эхлүүлсэн юм.
Тэрбээр X-ийг Хятадын WeChat шиг олон зориулалттай супер аппликэйшн болгох тухай ярьж байв. Гэсэн хэдий ч Маскийн зорилго, X-ийн ирээдүй одоо болтол тодорхойгүй хэвээр байна.
Дөнгөж өнгөрсөн долоо хоногт тэр X-ийг танилцах үйлчилгээний аппликэйшн болгох бодолтой байгаагаа компанийн дотоод арга хэмжээний үеэр ярьсныг гэрчүүд мэдээлжээ.
Эх сурвалж: Business Insider
