Израилийн арми Газар дундын тэнгисийн эргийн Палестины газар нутаг болох Газын зурвасыг голоор нь хоёр хувааснаа Ням гарагт зарлажээ. Газын зурвас нь 41 км урт, 6-12 км өргөн хэмжээтэй нарийн зурвас газар юм. Өөрөөр хэлбэл Израилийн цэргүүд Газын нутаг дэвсгэрийг хөндлөн туулж, Газрын дундад тэнгисийн эрэгт хүрсэн байна.
“Өнөөдөр Газын зурвас умард болон өмнөд хэсгүүдэд хуваагдлаа” гэж Израилийн армийн хэвлэлийн төлөөлөгч Даниэл Хагари өчигдөр сэтгүүлчдэд мэдэгджээ.
Үүнийг тэр Хамасын зэвсэгт бүлэглэлийн эсрэг явуулж буй дайны “чухал алхам” гэж тодорхойлсон байна.
Израилийн хэвлэлүүдийн мэдээлснээр тус улсын цэргүүд 48 цагийн дотор Газа хотод нэвтрэх төлөвтэй байгаа гэнэ. Өнгөрсөн долоо хоногийн дундуур Газын зурвасын хамгийн том энэ хотыг Израилийн арми бүрэн бүсэлснээ зарласан юм.
Өчигдөр бас Газын зурваст интернэт холболт гурав дахь удаагаа тасарсныг НҮБ болон хүмүүнлэгийн байгууллагууд мэдээлжээ.
Дайн эхэлснээс хойш энд эхний удаагийн тасралт 36 цаг үргэлжилж байсан бол хоёр дахь нь цөөн хэдэн цаг үргэлжилж байв.
Ням гарагт бас Израилийн нисэх онгоцнууд Газын зурвасыг үргэлжлүүлэн бөмбөгдсөн байна.
Өчигдөр өглөө нисэх онгоцнууд Газын хоёр том дүрвэгсдийн хуаранг бөмбөгдөх үеэр 53 хүн алагдаж, олон арван хүн шархадсан тухай албаны эх сурвалжууд мэдээлжээ.
АНУ-ын засаг захиргаа Газын зурваст гал зогсоож, хүмүүнлэгийн тусламж нэвтрүүлэх боломж олгохыг уриалсан ч Израилийн эрх баригчид барьцааны хүмүүсийг аврах болон Хамас байгууллагыг бүрэн устгах хүртлээ дайныг зогсоохгүй гэдгээ мэдэгдээд байна.
Нэг сар орчим хугацаанд үргэлжилсэн дайны үеэр Газын зурваст 9,700 гаруй палестин хүн алагдсаны 4,000 гаруй нь хүүхэд байгааг Палестины албаныхан өчигдөр мэдээлжээ.
Эх сурвалж: Aljazeera
