Умард Солонгосын дэглэм саяхан жил бүрийн арваннэгдүгээр сарын 18-ны өдрийг Пуужингийн Салбарын өдөр болгон бүх нийтээр амарч байх шийдвэр гаргасан байна.
Уг шийдвэрээ 2022 оны арваннэгдүгээр сарын 18-ны өдөр тус улс Хвасон-17 тив алгасах баллистик пуужинг амжилттай туршсантай холбогдуулан авсан арга хэмжээ гэж тайлбарлажээ.
Гэхдээ судлаачид энэ өдрийг Ким Жон Ун өөрийн охин Ким Жү Эйг алдаршуулах зорилгоор тэмдэглэлт өдөр болгосон гэж дүгнэж байна.
Учир нь 2022 оны энэ өдөр пуужин туршихдаа Ким Жон Ун охиноо анх удаа олон нийтийн өмнө дагуулж явсан юм. Тэр үеэс хойш Ким охиноо өөр хэд хэдэн чухал арга хэмжээнд дагуулж оролцсон бөгөөд Ким Жү Эйг тус улсын дараагийн удирдагч болох хүн гэсэн ойлголт нийтэд тараад байгаа.
“Энэ өдөр Ким Жү Эй аавтайгаа Хвасон-17 баллистик пуужингийн туршилтын талбайд ирж, анх удаа олны нүдэнд ил гарсан юм. Гэхдээ туршсан Хвасон-17 нь Умард Солонгосын анхны ч, хамгийн сүүлийн үеийн ч баллистик пуужин байгаагүй. Тиймээс дээрх шийдвэрийн учир шалтгаан тодорхой харагдахгүй байна” гэж Өмнөд Солонгосын Сэжон Хүрээлэнгийн судлаач Чон Сон Чан ярьжээ.
Хэрвээ пуужингийн салбарын өдрийг үнэхээр тэмдэглэхээр шийдсэн бол 2017 онд анхны баллистик пуужин Хвасон-15-ыг амжилттай туршсан арваннэгдүгээр сарын 29-ний өдрийг сонгох боломжтой байсан гэж тэр үзэж байна.
Бас одоо бүтээж буй анхны хатуу түлштэй Хвасон-18 пуужингийн үр дүнг хүлээх ёстой байсан гэнэ.
“Умард Солонгос энэ өдрийг сонгосон гол зорилго нь Ким Жон Уны залгамжлагчийг алдаршуулж, нэр хүндийг нь өсгөх бололтой. Цаашдаа жил бүрийн энэ өдөр Хвасон-17 пуужингийн амжилтыг дурсахдаа Ким Жү Эйн аавтайгаа хамт авхуулсан гэрэл зургийг нийтэд үзүүлэхээр болж байна” гэж Чон Сон Чан тайлбарлажээ.
Саяхан Өмнөд Солонгосын эх орноо нэгтгэх яамны сайд Ким Юн Хо бас ижил дүгнэлт хийсэн юм.
“Тэрбээр нийтдээ 16 удаагийн томоохон арга хэмжээнд оролцож, олон нийтийн өмнө ил гарсан нь залгамжлагч болох ирээдүйтэйг харуулж байна” гэж сэтгүүлчидтэй уулзахдаа хэлсэн сайд Пуужингийн Салбарын өдөр Ким Жү Эйд зориулагдсан байх боломжийг үгүйсгээгүй юм.
Эх сурвалж: Korea Times
