Мягмар гарагийн орой Израилийн эрх баригчид Газын зурваст явуулж буй байлдааны ажиллагаанд нь чухал ахиц гарсан тухай мэдээлжээ.

Тухайлбал зэвсэгт хүчин нь “Газ хотын зүрхэнд хүрсэн” тухай мэдээг тус улсын батлан хамгаалахын сайд Йоав Галант сэтгүүлчдэд дуулгажээ.

Дайн эхэлснээс хойш нэг бүтэн сарын хугацаа өнгөрч байгаа ба энэ хугацаанд Хамасын 14,000 орчим байг цохиж, газар доорх 100 хонгилыг устгасан тухай Израилийн армийн хэвлэлийн төлөөлөгч Даниэл Хагари энэ үеэр мэдээлсэн байна.

Газын зурвасын хамгийн их хүн ам төвлөрсөн хэсэг нь Газ хот юм.

Палестины Хамас зэвсэгт байгууллагын гол төв болдог энэ хотод тэд газар доогуур маш том хонгил, нуувчийн дэд бүтэц байгуулсан гэдэг.

Тэдгээрийн зарим нь хотын эмнэлгүүдийн доор байгуулагдсан гэж Израилийн тал үзэж байна. Тухайлбал Газ хотын хамгийн том эмнэлэг Аль-Шифагийн дор ийм хонгилын систем байдаг тухай мэдээлжээ.

“Газ хот бол хүний гараар бүтсэн хамгийн том терроризмын бааз юм” гэж батлан хамгаалахын сайд Галант тайлбарласан байна.

Хамас-Израилийн дайн үргэлжлэх зуур Газын зурваст амиа алдсан энгийн номхон иргэдийн тоо нэмэгдсээр байгаа. Хамасын албаныхны өчигдөр өгсөн мэдээллээр бол энд амиа алдсан палестин хүний тоо 10,300 хүрсний 4,100 гаруй нь хүүхэд байгаа гэнэ.

Газын зурваст өдөр бүр дунджаар 160 хүүхэд амиа алдаж байгаа гэх тоо баримтыг НҮБ-ын төлөөлөгч өчигдөр бас мэдээлжээ.

Аравдугаар сарын 7-ны өдөр Газын зурвасаас Хамасын дайчид Израилийн нутаг дэвсгэрт гэнэдүүлэн довтолсноор дайн эхэлсэн юм.

Хамасын халдлагын үеэр Израилийн талд 1,400 гаруй хүн алагдаж, 240 орчим хүн барьцаалагдсан гэдэг.

Эх сурвалж: BBC