Украины дайнд ашиглах зэвсэг техникийн нийлүүлэлтийг тасалдуулахгүйн тулд Оросын эрх баригчид өмнө нь экспортолсон батлан хамгаалах салбарын бараа бүтээгдэхүүнүүдээ буцаан худалдаж авч эхэлсэн тухай The Wall Street Journal өнөөдөр мэдээлжээ.
Тухайлбал энэ оны дөрөвдүгээр сард Оросын албаныхан Кайр хотод Египетийн ерөнхийлөгч Абдел Фаттах эль-Сиситэй уулзахдаа өмнө нь тус улсад нийлүүлсэн нисдэг тэрэгний зуу гаруй хөдөлгүүрийг буцааж авах хүсэлт тавьсныг эх сурвалж мэдээлсэн байна.
Ерөнхийлөгч Сиси зөвшөөрснөөр энэ оны арванхоёрдугаар сард хөдөлгүүрүүдийг ОХУ руу тээвэрлэж эхлэхээр болсныг гэрчүүд мэдээлжээ.
Египетийн засгийн газрын хэвлэлийн төлөөлөгч дээрх мэдээтэй холбогдуулан тайлбар өгөхөөс татгалзсан байна.
The Wall Street Journal сонины мэдээнд Москвагийн эрх баригчид бас Пакистан, Беларусь, Бразил улсын албаныхантай ижил асуудлаар уулзсан гэнэ.
2022 оны хоёрдугаар сарын 24-нд эхэлсэн Орос-Украины дайн сунжирч, талуудын аль аль нь зэр зэвсгийн хомсдолд ороод байгаа.
Оросын тал дотоодын үйлдвэрлэлээ нэмэгдүүлэхийн хажуугаар Иран, Умард Солонгос зэрэг бусад холбоотон улсуудаас зэр зэвсэг авахыг хичээж байна. Умард Солонгосын дэглэм ОХУ-д нэг сая гаруй их бууны сум нийлүүлсэн гэх тагнуулын мэдээг Өмнөд Солонгосын албаныхан өнгөрсөн сард зарлаж байлаа.
Энэ оны зургаадугаар сард эхэлсэн Украины армийн сөрөг давшилт удааширсан нь Өрнөдийн орнууд амласан зэвсэг техникээ хугацаанд нь нийлүүлээгүйтэй холбоотой гэж зарим ажиглагчид үзэж байгаа юм.
Эх сурвалж: Aljazeera