ОХУ-ын гадаад хэргийн сайд Сергей Лавров өчигдөр хэвлэлд ярихдаа Европын Холбооны эрх баригчид Төв Азийн бүс нутгаас Оросыг шахан зайлуулах зорилготой байгааг хэлжээ.

Зөвлөлтийн бүрэлдэхүүнд байсан “Стан” улсуудаас бүрддэг энэ бүс нутагт Украины дайны улмаас Оросын нөлөө суларч эхэлсэн бөгөөд одоо Европын Холбоо, Хятад, Турк, Иран улсууд нөлөөгөө өсгөхөөр өрсөлдөж байгаа юм.

“Төв Ази, Өвөр Кавказын бүс нутгаас Оросыг шахан гаргах санаархлаа Европын Холбооны удирдагчид нуухгүй байгаа. Ийм санаархал нь дэмий хоосон зүйл юм. Бидний түүхэн байр суурь тэндээс арилахгүй” гэж Лавров ярьжээ.

Өнгөрсөн долоо хоногт ОХУ-ын ерөнхийлөгч Владимир Путин тус бүс нутгийн хамгийн том (нутаг дэвсгэрийн хэмжээгээр) улс Казахстанд айлчилсан юм.

Үүнээс долоо хоног орчмын өмнө Францын ерөнхийлөгч Эммануэл Макрон бас Казахстанд айлчилж байв.

Макрон айлчлалынхаа үеэр Казахстаныг “цөөн хэдэн улсын эрхшээлд байхаас татгалздаг” хэмээн магтсан нь үнэндээ ОХУ-ыг хэлсэн хэрэг юм.

Лавров ярилцлагадаа Макроны энэ үгийг “дипломат үг хэллэгийн хувьд нэлээд увайгүй” гэж тодорхойлжээ.

Төв Азийн Казахстан, Узбекистан, Туркменистан, Киргизстан, Тажикистан улсууд сүүлийн үед олон улсын харилцаа, гадаад түншлэлээ өргөжүүлэхээр идэвхтэй ажиллаж байна.

Өнгөрсөн долоо хоногт Турк, Иран улсын өндөр дээд албан тушаалтнууд Узбекистаны нийслэлд айлчлан очсон юм. Мөн Ираны ерөнхийлөгч Эбрахим Раиси угсаа гарал нэгтэй Тажикистан улсад 18 сарын дотор хоёр дахь удаагаа айлчлахдаа хоёр улсын иргэдийг харилцан визгүй зорчуулах гэрээг байгуулсан байна.

Эх сурвалж: AFP