Газа хотын Аль-Шифа эмнэлгийн газар дор Хамас зэвсэгт байгууллагын удирдлагын төв байрлаж буйг өөрийн тагнуулын эх сурвалжаас олж мэдсэнээ АНУ-ын засаг захиргаа өчигдөр мэдэгджээ.
Хамас байгууллага тэнд их хэмжээний зэвсэг хадгалж, Израилийн армийн довтолгооны эсрэг тулалдахаар бэлдэж байгааг Цагаан ордны үндэсний аюулгүй байдлын зөвлөлийн хэвлэлийн төлөөлөгч Жон Кирби мэдээлсэн байна.
Израилийн эрх баригчид өмнө нь Хамасынхан эмнэлгүүдийг цэрэг, зэвсгийн бааз болгон ашигладаг талаар олон удаа ярьж байсан юм. Харин АНУ-ын засаг захиргаа анх удаа үүнийг өөрийн хараат бус эх сурвалжаар баталгаажуулж байна.
Палестины зэвсэгт байгууллага эмнэлгүүдийг бамбай болгон ашигладгаа няцаасаар ирсэн юм.
Газа хотын хамгийн том эмнэлэг Аль-Шифа сүүлийн өдрүүдэд Хамас-Израилийн дайны гол талбар болоод байгаа.
Энэ эмнэлэгт олон мянган хүн хоргодож байгаа гэсэн мэдээлэл бий.
Израилийн байлдааны ажиллагаа ямар хүнд хэцүү нөхцөлд явагдаж байгаа нь үүгээр батлагдаж буйг хэлсэн Кирби “Хамас энгийн номхон иргэдийн дунд хэр гүнзгий нэвтэрсэн нь эндээс харагдаж байна. Бид эмнэлэгт агаараас довтлох, эмнэлгийг тулааны талбар болгохыг дэмжихгүй байгаа нь гэмгүй хүмүүс, өвчтөнүүд, зүгээр л эрүүл мэндийн тусламж авах гэсэн хүмүүсийг галын бай болгохыг хүсэхгүй байгаатай холбоотой. Эмнэлгүүд, өвчтөнүүдийг хамгаалах ёстой” гэж Кирби мэдэгджээ.
Цагаан ордны мэдэгдэл нь Израилийн армид эмнэлгийг бөмбөгдөх зөвшөөрөл олгож, “ногоон гэрэл” асаасан хэрэг гэж үзэж байгаагаа Хамасын төлөөлөгч өчигдөр бас мэдэгдсэн байна.
Аль-Шифа эмнэлгийн захирал Мохаммад Абу Салмия нийт 179 хүний шарилыг эмнэлгийнхээ хашаанд бөөнөөр нь оршуулсныг өчигдөр хэвлэлд ярьжээ.
Тэдгээрийн дотор цахилгааны тасалдлын улмаас амиа алдсан эрчимт эмчилгээний тасгийн 29 өвчтөн байгааг тэр хэлсэн байна.
Даваа гарагт Израилийн арми Газа хотын хойд хэсэгт оршдог Рантиси хүүхдийн эмнэлгийн дор Хамасын байгуулсан нуувч хонгилыг үзүүлсэн юм.
Зургаан минутын урттай уг дүрс бичлэгт эмнэлгийн байрнаас 200 метр зайд байгаа хонгилын гарцыг үзүүлжээ. Уг гарц газар доогуур эмнэлэгтэй холбогддог болохыг Израилийн армийн хэвлэлийн төлөөлөгч Даниэл Хагари тайлбарласан байна.
Ийм хонгилуудад барьцаалагдсан иргэд нь хоригдож байгаа гэж Израилийн тал үзэж байгаа юм.
Аравдугаар сарын 7-нд эхэлсэн Хамас-Израилийн дайны улмаас сүүлийн байдлаар 11,000 гаруй палестин хүн алагдаад буйг Газын албаныхан мэдээлж байна.
Эх сурвалж: BBC
