Газын зурваст олон зуун километр урт үргэлжилсэн газар доорх хонгилын дэд бүтэц байгуулснаа Палестины Хамас зэвсэгт байгууллага хүлээн зөвшөөрдөг. Гэхдээ эмнэлэг мэтийн иргэний байгууламжийн доор ийм дэд бүтэц байгуулснаа няцаасаар ирсэн юм.
Тэгвэл Ням гарагт Израилийн арми Газа хотын хамгийн том эмнэлэг Аль-Шифагийн дороос ийм хонгил илрүүлснээ мэдээлжээ.
Уг хонгил нь 10 метрийн гүнд 55 метр үргэлжилсэн, төгсгөлдөө дэлбэрэлтэд тэсвэртэй бэхжүүлсэн хаалгатай байсныг мэдээлсэн байна.
“Ийм төрлийн хаалгыг Хамас террорист байгууллага Израилийн цэргүүдийг өөрийн удирдлагын төвүүд рүү нэвтрэхээс хамгаалах зорилгоор ашигладаг” гэж Израилийн армийн мэдэгдэлд тайлбарлажээ.
Уг мэдэгдэлдээ төмөр бетон хүрээтэй саарал металл хаалганы дүрс бичлэгийг хавсаргасан байна.
Гэхдээ хаалганы цаана юу байгаа талаар дурдаагүй юм.
Сүүлийн өдрүүдэд Аль-Шифа эмнэлэг Израилийн армийн байлдааны ажиллагааны гол талбар болоод байгаа.
Израильчууд уг эмнэлгийн дор Хамасын удирдлагын төв байрладаг гэж үзэж байна. Харин Хамасын тал болон эмнэлгийн ажилтнууд үүнийг няцааж байгаа.
Цэргийн түрэгч машин Аль-Шифа эмнэлгийн нэг ханыг нураасны дараа доош эргэлдсэн шатаар 10 метр уруудаж ордог хонгилын амсрыг илрүүлсэн тухай Израилийн армийн хэвлэлийн төлөөлөгч Даниэл Хагари сэтгүүлчдэд тайлбарлажээ.
Түүний тайлбараас үзвэл цэргүүд хонгилоор 55 метр явж төгсгөлд нь байгаа хаалганд хүрсэн ч урхинд орохоос болгоомжлон нээх гэж оролдоогүй байгаа бололтой.
Хаалганы цаана бусад хонгилуудын уулзвар, эсвэл команд удирдлагын том төв байх боломжтой гэж Израилийн тагнуулын алба үзэж байгаа гэнэ.
Лхагва гарагт Израилийн цэргүүд Аль-Шифа эмнэлгийн 20 гаруй акр талбайтай байгууламжид нэвтрэхэд 2,000 орчим хүн байсныг Хагари мэдээлжээ.
Энэ үеэр эмнэлгийн хашаанаас гар бөмбөг харвагч, тэсрэх бодис, АК47 автомат буу зэрэг их хэмжээний зэр зэвсэг ачсан Toyota үйлдвэрийн пикап автомашин илрүүлсэн байна.
Аравдугаар сарын 7-нд Хамасынхан Израилийн нутаг дэвсгэрт халдахдаа ийм зэвсэглэсэн автомашинууд ашиглаж байсан юм.
Аль-Шифа эмнэлэгт явуулж буй Израилийн армийн ажиллагааг олон улсын хамтын нийгэмлэг, Дэлхийн Эрүүл Мэндийн Байгууллага (ДЭМБ) буруушааж байгаа.
Энд хүнд өвчтөнүүдээс гадна орон гэрээсээ дайжсан хэдэн мянган энгийн хүн толгой хоргодож байгаа гэдэг.
Аль-Шифа эмнэлгээс дутуу төрсөн 31 нярайг Газын зурвасын өмнөд хэсэгт эсэн мэнд шилжүүлж чадсанаа ДЭМБ өчигдөр мэдээлсэн юм.
Тэднийг эмнэлгийн зургаан ажилтан, гэр бүлийн 10 хүн дагалдаж ирсэн байна. Удахгүй нярайнуудыг Египетийн хилээр нэвтрүүлж, Рафах боомт дахь Арабын Нэгдсэн Эмират Улсын санхүүжүүлдэг эмнэлэгт хүргэхээр төлөвлөж буйг Палестины Улаан Хавирган Сар байгууллага мэдээлжээ.
Эх сурвалж: AFP
