“Үхрийн сүүлэн дээр хутга” гэгчээр сонгууль болоход хагас жил гаруйхан хугацаа үлдээд байхад МАН-ын буюу Л.Оюун-Эрдэнийн Засгийн газраас ахиад нэг сайд огцрох нь тодорхой болсон бололтой.

Зам тээврийн хөгжлийн сайд С.Бямбацогтыг хүн зодож, танхайрсан гэх гомдол цагдаагийн газарт очиж, хэргийн мөрөөр шалгаж эхэлсэн байна.

Хэргийг тодруулбал, УИХ, Засгийн газрын гишүүн С.Бямбацогт нь “УБТЗ” ХНН-ийн орлогч дарга Н.Энхцогтыг зодоод зогсохгүй, тавьтиргүй үг, ёс бус зэрлэг балмад зан гаргаж, “УБТЗ”-ын Орос, Монголын төлөөлөгчдийг элдвээр хэлэн доромжилж, транзит тээврийн урсгалыг гацааж болзошгүй нөхцөл байдлыг үүсгэжээ.

Цаашлаад өвлийн хахир өдрүүдэд шатахуун болон тослох материалуудын тээвэрлэлт тодорхойгүй хугацаагаар саатаж магадгүй болоод байна.

Энэхүү хэрэг 10 дугаар сарын 9-ний орой “Тээврийн долоо хоног-2023” олон улсын форумд оролцогчдод зориулсан хүлээн авалтын үеэр болсон аж. “Бүсийн тээвэр логистикийн холболтыг бэхжүүлэх нь” сэдэв дор болсон энэхүү форумын хүлээн авалтад Ази, Европын төмөр замын компаниуд болон олон улсын тээврийн асуудал эрхэлсэн 20 гаруй байгууллагын төлөөлөгчид оролцсон бөгөөд Монгол Улсын сайд С.Бямбацогтын Оросыг үзэн ядан хашгирч, орилж чичлэхийг алмайран харж, зарим нь гар утсандаа баталгаажуулсан гэнэ.

Зам тээвэр хөгжлийн сайд С.Бямбацогт хувь хүний ухамсартаа Оросыг үзэн яддаг байж болох ч Монгол Улсыг төлөөлсөн төрийн сайд хүний хувьд дэд бүтцийн чухал салбар болох УБТЗ-ын албан тушаалтнуудыг “оросын тагнуул” хэмээн цоллон дуудаж, Монголоо Оростой нийлсэн улс хөгждөггүй хэмээн онцлох нь ёс зүйтэй үйлдэл яавч биш нь ойлгомжтой. Түүгээр зогсохгүй УБТЗ-ын орлогч дарга Н.Энхцогтыг олны өмнө улаан нүүр рүү нь цохиж, танхайрсан эрүүгийн хэрэг өдүүлснийг тэнд цугласан олон харсан учраас мэлзэх аргагүй юм.

Төрийн албаны ёс зүйн дүрмээр “албан үүргээ гүйцэтгэх явцдаа болон ажлын байранд архидан согтуурах"-ыг зөрчилд тооцож ажлаас чөлөөлөх хүртэл арга хэмжээ авдаг. Тэгвэл олон улсын төлөөлөгчдийн өмнө ёс бус авирласан Төрийн сайддаа ямар хариуцлага хүлээлгэх вэ.

Л.Оюун-Эрдэнэ сайд ч дээрх үндэслэлээр нэг биш хүнийг ажлаас чөлөөлсөн байдаг. Монгол Улсын сайд бол улс төрийн албан тушаалтан. Гэхдээ Монгол төрийн албаны хамгийн ёс зүйтэй нэгэн байх нь зүйн хэрэг. Харамсалтай нь, манай Засгийн газрын сайд С.Бямбацогтын хувьд Үндсэн хуулийн "Хүнийг үндэс, угсаа, хэл, арьсны өнгө, нас, хүйс, нийгмийн гарал, байдал, хөрөнгө чинээ, эрхэлсэн ажил, албан тушаал, шашин шүтлэг, үзэл бодол, боловсролоор нь ялгаварлан гадуурхаж үл болно. Хүн бүр эрх зүйн этгээд байна" гэх заалтыг зөрчиж, хүний эрхийг уландаа гишгээд байна.

ЗГХЭГ-ын дарга, МАН-ын генсек Д.Амарбаясгалан “МАН 2022 онд шинэчилсэн ёс зүйн дүрмээрээ улс төрийн хариуцлага хүлээлгэх асуудлаа баталгаажуулсан. Улс төрч илт ёс зүйн алдаа гаргасан бол улс төрийн хариуцлага хүлээнэ” хэмээн олонтаа давтаж хэлснийг энд сануулья.