Даваа гарагт Цагаан ордонд АНУ-ын ерөнхийлөгч цацагт хяруулын амийг өршөөх ёслолын ажиллагаа болжээ.
Жил бүрийн талархлын баярын өмнө болдог энэ арга хэмжээ нь 1947 оноос эхлэлтэй уламжлалт зан үйл юм.
Анх АНУ-ын цацагт хяруулын аж ахуй эрхлэгчид, фермерүүд ерөнхийлөгч Харри Трумэнд баярын ширээндээ тавих цацагт хяруул илгээж байжээ. Дараа дараагийн ерөнхийлөгч нар ингэж илгээсэн цацагт хяруулаар баярын ширээгээ чимдэг байв.
Харин 1980-аад оны сүүлчээс эхлэн тэдний илгээсэн цацагт хяруулыг баярын зоог болголгүй өршөөл үзүүлж, буцаадаг уламжлал тогтсон юм.
Өчигдөр ерөнхийлөгч Жо Байден өөрт нь илгээсэн Либерти, Бэлл нэртэй хоёр цацагт хяруулыг өршөөсөн байна.
“Либерти, Бэлл нарыг би өршөөж байна. Шувуудад баяр хүргэе” гэж тэр энэ үеэр хэлсэн юм.
Энэ жилийн талархлын баяраар АНУ даяар 200 сая гаруй цацагт хяруулыг хүнсэнд хэрэглэх тооцоотой байгааг дээрх арга хэмжээнд оролцсон Үндэсний Цацагт Хяруулын Холбооны ерөнхийлөгч Стив Ликкен мэдээлжээ.
Өчигдөр бас ерөнхийлөгч Байдены төрсөн өдөр давхацсан юм. АНУ-ын түүхэнд хамгийн өндөр настай ерөнхийлөгчид тооцогддог тэрбээр энэ өдөр 81 нас хүрсэн байна.
“Ташрамд дурдахад өнөөдөр миний төрсөн өдөр тохиож байна” гэж Байден ёслолын арга хэмжээнд оролцсон хүмүүст хэлжээ.
Тэрбээр Цагаан Ордонд цацагт хяруул хүлээж авдаг уламжлалаас ч урт насалж байгаагаа энэ үеэр хошигнон ярьсан юм.
“Энэ арга хэмжээний 76 жилийн ой өнөөдөр болж байна. Гэхдээ анхны арга хэмжээнд нь намайг оролцоогүйг та бүхэн мэдээсэй гэж би хүсэж байна” гэж тэр хэлжээ.
Түүний өндөр нас ирэх жил АНУ-ын ерөнхийлөгчөөр дахин сонгогдож ажиллахад нь саад болох эсэх талаар маргаан ид үргэлжилж байгаа.
Өчигдөр Байден цацагт хяруулуудын талаар хошигнол хэлэхдээ поп оддын нэрсийг сольж алдаа гаргасан нь уг маргааныг дахин сэдрээсэн байна.
Тэрбээр Цагаан Ордонд ирэхийн тулд 1,000 км зам туулсан цацагт хяруулуудын талаар “Энэ аялал та нарын хувьд Renaissance Tour аялан тоглолтын тасалбарыг олж авахаас ч хэцүү байсан байх. Бритнигийн аялан тоглолтыг би хэлж байна. Тэр яг одоо Бразилд байгаа” гэж ярьжээ.
Байден яриандаа поп од Тэйлор Свифтийн "Eras Tour" аялан тоглолтыг дурдахдаа тоглолтын нэрийг, бас дуучны нэрийг андуурсан бололтой. Тэйлор Свифт одоо Өмнөд Америкт аялан тоглолтоо үргэлжлүүлж байгаа. Баасан гарагт тэр Бразилын Рио де Жанейро хотод концертоо тоглосон юм.
Эх сурвалж: Associated Press
