Умард Солонгосын дэглэм батлан хамгаалах зориулалттай анхны хиймэл дагуулаа дэлхийн тойрог замд амжилттай хүргэснийг зарлажээ.
Маллигён-1 хиймэл дагуулыг хөөргөх үйл явцыг тус улсын удирдагч Ким Жон Ун ажигласан тухай Солонгосын Төв Мэдээний Агентлаг мэдээлсэн байна.
Хиймэл дагуулыг Окинава арлуудын дээгүүр Номхон далайн чиглэлд хөөргөж, үндэсний аюулгүй байдалд нь заналхийлснийг Япон улсын ерөнхий сайд Фүмио Кишида хатуу шүүмжилжээ.
АНУ-ын ерөнхийлөгчийн Цагаан ордон үүнийг НҮБ-ын хэд хэдэн тогтоолыг зөрчсөн үйлдэл болохыг анхааруулсан байна.
Өнгөрсөн шөнө хиймэл дагуулыг хөөргөх үеэр Япон улсын засгийн газар Окинава мужид түгшүүр зарлаж, арлын оршин суугчдыг хоргодох байранд шилжүүлсэн юм.
Умард Солонгос энэ онд хоёр удаа хиймэл дагуул хөөргөсөн нь амжилтгүй болоод байв. Гурав дахь туршилтынхаа өмнө тус улсын эрх баригчид Японы талд урьдчилсан анхааруулсан юм.
“Хэдийгээр зорилго нь хиймэл дагуул хөөргөх ч баллистик пуужингийн технологийг ашигласан нь НҮБ-ын аюулгүй байдлын зөвлөлийн холбогдох тогтоолыг илт зөрчсөн хэрэг юм. Энэ бол манай улсын ард иргэдийн аюулгүй байдалд заналхийлсэн ноцтой үйлдэл” гэж Японы ерөнхий сайд Кишида мэдэгджээ.
Хиймэл дагуул хөөргөсний дараа Өмнөд Солонгосын засгийн газар 2018 онд хоёр улсын хооронд байгуулсан дайсагналыг намжаах гэрээний зарим заалтыг цуцалж, Умард Солонгосын хил дагуу харуул хамгаалалтаа чангатгахаар болсныг зарласан байна.
Умард Солонгосын тал хиймэл дагуул хөөргөхдөө тус улсын баруун хойд нутагт, Хятадын хилтэй ойр оршдог Сохэ агаарын баазыг ашиглажээ.
Дэлхийн тойрог замд тагнуулын хиймэл дагуултай болсноор Умард Солонгосын дэглэм гаднын халдлагыг урьдчилж мэдэх боломжтой болох юм.
Гэхдээ энэ оны тавдугаар сард болсон эхний оролдлогын дараа Өмнөд Солонгосын тал далайд унасан хиймэл дагуулын сэгийг олж судлаад цэрэг, тагнуулын зориулалттай ямар нэг тоног төхөөрөмж агуулаагүйг тогтоож байв.
Хоёр дахь оролдлогоо Пёньян наймдугаар сард гүйцэтгэж байлаа.
Энэ сарын эхээр Өмнөд Солонгосын засгийн газар мөн өөрийн тагнуулын хиймэл дагуулыг арваннэгдүгээр сарын сүүлээр АНУ-ын SpaceX компанийн пуужинд тээвэрлэн тойрог замд хүргэх төлөвлөгөөг зарласан юм.
Тус улс 2025 он хүртэл нийт таван хиймэл дагуул хөөргөхөөр төлөвлөсний эхнийх нь энэ болохыг эх сурвалжууд мэдээлсэн байна.
Эх сурвалж: BBC
