Дэлхийн Эрүүл Мэндийн Байгууллага (ДЭМБ) өчигдөр Хятад улсын эрх баригчдаас тус улсын хойд хэсэгт дэгдсэн амьсгалын замын өвчний талаар дэлгэрэнгүй мэдээлэл өгөхийг хүссэн байна.

Арваннэгдүгээр сарын 13-ны өдөр Хятадын Эрүүл Мэндийн Үндэсний Хорооноос зохион байгуулсан хэвлэлийн хурлын үеэр сүүлийн үед тус улсын хүн амын дунд амьсгалын замын өвчлөл нэмэгдсэн тухай мэдээлж байжээ.

Эрх баригчид энэ дэгдэлтийг коронавирусийн цар тахлын хорио цуцлагдсаны дараа улирлын чанартай томуу, амьсгалын замын өвчлөл нэмэгдсэнтэй холбон тайлбарлаж байв.

2019 оны сүүлээр Ухань хотод шинэ коронавирусийн халдвар дэгдэхэд ил тод мэдээллээр хангаагүй гэсэн шүүмжлэлтэй ДЭМБ болон Хятадын эрх баригчид тулгарч байсан.

Тиймээс ДЭМБ өмнөх алдаагаа давтахгүйн тулд дээрх дэгдэлтэд нухацтай хандаж, дэлгэрэнгүй мэдээлэл өгөхийг Хятадын талаас хүссэн байна.

ДЭМБ-аас олон улсын эрүүл мэндийн зохицуулалтын механизмын дагуу эпидемиологийн болон эмнэлзүйн нэмэлт мэдээлэл, лабораторийн шинжилгээний үр дүнг хүссэнээ мэдээлжээ.

Мөн томуугийн өвчлөлийн нөхцөл байдал, эрүүл мэндийн системд үүсгэж буй ачааллын талаар цаашдаа мэдээлж байхыг Хятадын эрх баригчдаас хүссэн байна.

ДЭМБ-ын Хятад дахь төлөөлөгчийн газар үүнийг ямар нэг онцгой зүйл биш, гишүүн улс орнуудаасаа мэдээлэл авдаг ердийн арга хэмжээ гэж тайлбарлажээ.

Аравдугаар сарын дундаас хойш Хятадын хойд бүс нутгийн хүн амын дунд томуу төстэй амьсгалын замын өвчлөл өмнөх гурван жилийн мөн үетэй харьцуулахад өссөн тухай ДЭМБ мэдээлсэн байна.

Хятадын хэвлэлүүд болон сошиал сүлжээнд Шиань зэрэг хотуудын эмнэлэгт үзүүлэхээр дугаарлан зогссон хүүхдүүд, эцэг эхчүүдийн зураг, дүрс бичлэг нийтлэгдэж байв.

Нэмэлт мэдээлэл авах хүртэл вакцинжуулалтад хамрагдах, өвчилсөн хүмүүстэй ойр харилцахгүй байх, өвдсөн тохиолдолд гэртээ өөрийгөө тусгаарлах, амны хаалт зүүх, өрөө тасалгаагаа агааржуулах, гараа тогтмол угаах зэрэг урьдчилан сэргийлэх арга хэмжээнүүд авахыг Хятадын хойд бүсийн ард иргэдэд ДЭМБ зөвлөсөн байна.

Эх сурвалж: Reuters