Өнгөрсөн долоо хоногт Сан-Франциско хотод болсон АНУ-БНХАУ-ын дээд хэмжээний уулзалтаар Украины дайны асуудал хөндөгдсөн.
Тухайлбал энэ үеэр АНУ-ын засаг захиргаа Оросыг дэмжих Хятадын байр суурийг өөрчлөх шахалт үзүүлсэн нь тодорхой байгаа.
Өчигдөр Кремлийн хэвлэлийн төлөөлөгч Дмитрий Песков энэ талаар сэтгүүлчдийн асуултад хариулжээ.
“Америкчуудын дарамт шахалтын тухайд энэ нь ямар ч утгагүй зүйл болохыг цаг хугацаа удаа дараа харуулсан. Манай хоёр улс өөрсдийн байр суурь, зам дээр тууштай зогсож байгаа” гэж Песков энэ үеэр хэлсэн байна.
Тэрбээр цааш нь Орос улс Украинтай хэлэлцээ хийхээс хэзээ ч татгалзаж байгаагүйг илэрхийлээд “Гэвч нөгөө тал (Украин) татгалзсаар байгаа. Хэрвээ шахалт үзүүлэх тухай ярьж байгаа бол шахуулах ёстой нь тэд байх” гэж мэдэгджээ.
Москва-Бээжингийн түншлэлийн талаар ярихдаа Песков “Украины асуудлаарх Хятадын байр суурьт тодорхой нюансууд байгаа нь гарцаагүй. Бид ч үүнийг мэддэг, манай хятад найз нар ч энэ тухай илэн далангүй ярьдаг. Гэхдээ дэлхий нийтийн үйл хэрэгт баримтлах үзэл бодол, дэлхийд дангаар ноёлох ёсны эсрэг байр суурь, бусдыг үл тоомсорлох үзлийн эсрэг байр суурь маань биднийг Хятадтай нэгтгэдэг. Энэ нийтлэг байр суурь маань стратегийн хувьд биднийг Хятадтай нэгдмэл байх баталгаа болдог юм” гэж дүгнэжээ.
Эх сурвалж: ТАСС