Даваа гарагийн шөнө дунд дуусах байсан дөрвөн өдрийн гал зогсоох хугацаа дахин хоёр өдрөөр сунгагдах болсныг Хамас, Израилийн талуудад зуучлагч Катарын засгийн газар мэдэгджээ.
Өчигдөр буюу гал зогсоох хугацааны сүүлчийн өдөр Хамасын тал Израилийн 11 барьцааны хүнийг сулласан бол хариуд нь Израилийн тал шоронгоосоо 33 палестин хүнийг сулласан байна.
Суллагдсан барьцааны хүмүүсийн дотор гурван настай ихэр хүүхдүүд байжээ. Палестины хоригдлуудын 30 нь насанд хүрээгүй, 3 нь эмэгтэй байсан байна.
Ингэснээр гал зогсоосон дөрвөн өдрийн хугацаанд нийтдээ 50 гаруй барьцааны хүнийг үүнээс гурав дахин олон палестин хоригдлоор солилцжээ.
Сунгасан хоёр өдрийн хугацаанд Хамас зэвсэгт байгууллага дахин 20 хүүхэд, эмэгтэйчүүдийг палестин хоригдлуудаар солилцох тохиролцоонд хүрсэн байна.
АНУ-ын төрийн нарийн бичгийн дарга Энтони Блинкен энэ долоо хоногийн сүүлээр Ойрх Дорнодод айлчлахаар болжээ.
Энэ нь Хамас-Израилийн дайн эхэлснээс хойш түүний энэ бүс нутагт хийж буй гурав дахь айлчлал юм.
Тэрбээр Израиль улс, Баруун эрэг дэх Палестины нутаг дэвсгэрт зочилж, Газын зурваст үзүүлэх хүмүүнлэгийн тусламжийг үргэлжлүүлэх, барьцааны хүмүүсийг бүгдийг суллуулах, Газын зурваст энгийн иргэдийн аюулгүй байдлыг сайжруулах зэрэг асуудлуудаар талуудтай яриа хэлэлцээ хийх юм байна.
Аравдугаар сарын 7-нд Палестины Хамас зэвсэгт байгууллага Израилийн нутаг дэвсгэрт халдан довтлох үеэр энгийн иргэд голдуу 1,200 гаруй хүн алагдаж, 240 орчим хүн барьцаалагдсан.
Израилийн армийн Газын зурваст явуулсан хариу байлдааны ажиллагааны улмаас 14,500 гаруй палестин хүний амь үрэгдээд байна.
Эх сурвалж: BBC