Дэлхийн хамгийн баян хүн гэгддэг Илон Маск өнгөрсөн Даваа гарагт Израиль улсад айлчилж, Палестины Хамас зэвсэгт байгууллагын үйлдсэн халдлагын хор уршигтай газар дээр нь танилцсан юм.
Израилийн ерөнхий сайд Бенжамин Нетаньяху түүнийг дагуулан Газын зурвасын хилээс 3 км зайд оршдог сууриныг үзүүлсэн байна. Кфар Аза хэмээх нэртэй фермерийн аж ахуйн энэ сууринд аравдугаар сарын 7-ны өдөр 50 гаруй хүн Хамасынхны гарт алагдсан юм.
Израильд ирэхээсээ өмнө Маск антисемитист үзлийг өөрийн эзэмшлийн Х сошиал платформд дэмжсэн гэх шүүмжлэлд өртөөд байжээ. Тэрбээр жүүдийн эсрэг хуйвалдааны онолын агуулгатай бусдын нийтлэлийг дэмжиж буйгаа илэрхийлсэн нь шуугиан тарьсан юм.
Харин Даваа гарагт тэр зөрчил мөргөлдөөнд Хамас байгууллага буруутайг хүлээн зөвшөөрч, Израилийн явуулж буй байлдааны ажиллагааг дэмжсэн байна.
“Хүний амийг хөнөөх зорилготой этгээдүүдийг аюулгүй болгох нь зүй ёсны үйлдэл. Хүмүүсийг ирээдүйн алуурчин болгоход бэлдэж буй суртал нэвтрүүлгийг зогсоох ёстой. Энэ бүхний дараа Газын зурвас цэцэглэн хөгжинө гэж би бодож байна. Ингэж чадвал сайхан ирээдүй хүлээж байна” гэж Маск айлчлалынхаа үеэр ярьсан юм.
Харин өчигдөр Палестины Хамас байгууллагын удирдлага тэрбумтныг Газын зурваст хүрэлцэн ирж, Израилийн армийн үйлдсэн нүгэлтэй танилцахыг урьжээ.
“Бид түүнийг Газад урьж, Газын ард түмний эсрэг үйлдсэн аллага, сүйтгэлийн цар хүрээг бодитоор харж танилцахыг хүсэж байна” гэж Ливаны нийслэл Бейрут хотод болсон хэвлэлийн хурлын үеэр Хамасын өндөр албан тушаалтнуудын нэг Осама Хамдан мэдэгдсэн байна.
Тэрбээр цааш нь ярихдаа “Өнгөрсөн 50 хоногийн хугацаанд Израилийн арми өөрийгөө хамгаалах чадваргүй Газын иргэдийн орон гэрийн дээрээс 40,000 гаруй тонн тэсрэх бодис хаялаа. АНУ-ын ерөнхийлөгч Жо Байденд тус улсын Израильтай харилцах харилцааг эргэн харж, тэдэнд зэвсэг нийлүүлэхээ зогсоохыг би уриалж байна” гэжээ.
Маскийн айлчлалын үеэр Starlink сансрын интернэт холболтын үйлчилгээг Израилийн засгийн газрын зөвшөөрөлгүйгээр Газын зурваст нэвтрүүлэхгүй байх тохиролцоонд хүрсэн тухай албаны эх сурвалжууд мэдээлж байна.
Эх сурвалж: The Guardian
