Францын тэргүүн баян Бернар Арно хүүхдүүдийн хамт

Швейцарын UBS банкнаас өчигдөр гаргасан тайланд дэлхийн тэрбумтнуудын дотор өв залгамжлагчдын хөрөнгийн өсөлт бизнес эрхлэгчдийнхээс давж эхэлсэн нь харагджээ.

Тус банк дэлхийн тэрбумтнуудын хөрөнгийг бүртгэж эхэлсэн сүүлийн бараг арван жилийн хугацаанд анх удаа ийм хандлага ажиглагдсан юм байна.

“Олон тэрбумтнууд нас ахиж байгаатай холбоотой хөрөнгийн их шилжилт эрч хүчээ авч байна. Мянга гаруй тэрбумтан нийт $5.2 их наядын хөрөнгөө өвлүүлж эхэлж байгаа тул энэ үзэгдэл ирэх 20 жилийн турш үргэлжилнэ гэж төсөөлж байна” гэж UBS банкны хөрөнгийн менежмэнтийн албаны гадаад стратегийн харилцагчийн газрын захирал Бенжамин Кавалли ярьжээ.

Энэ оны дөрөвдүгээр сарыг хүртэлх 12 сарын хугацаанд нийтдээ $150.8 тэрбумын хөрөнгө 53 өв залгамжлагчид шилжсэн байна.

Ижил хугацаанд бизнес эрхлэгч 84 тэрбумтны нийт хөрөнгийн хэмжээ $140.7 тэрбумаар өсжээ.

Дэлхий даяар энэ хугацаанд тэрбумтнуудын тоо 7 хувиар өсөж, 2,544 хүрсэн байна. Тэдгээрийн нийлбэр хөрөнгийн хэмжээ 9 хувиар өсөж, $12 их наядад хүрчээ.

Энэ нь 2021 оны оргил үзүүлэлт болох $13.4 их наядад хараахан хүрээгүй үр дүн юм. Тухайн үед цар тахлын дараах үнэт цаас, үл хөдлөхийн зах зээлийн өсөлтийн улмаас дэлхий даяар тэрбумтны тоо 2,686 хүрч байв. Тухайн онд компаниуд хөрөнгийн анхдагч зах зээлд хувьцаагаа зарж эхэлснээр хамгийн багадаа 60 шинэ тэрбумтан төрж байжээ.

Бизнес эрхлэгч тэрбумтнуудын хөрөнгийн өсөлт буурсан нь 2022-2023 оны хооронд IPO (Initial Public Offering) зах зээлийн өсөлт удааширч, шинэ бизнесийн боломжууд багассантай холбоотой юм.

“Сүүлийн үеийн эдийн засаг, геополитик, бодлогын тодорхойгүй байдал нь бизнес эрхлэгчдийг хөрөнгөө өсгөхөд саад болж байна” гэж UBS банкны хөрөнгийн менежмэнтийн ахлах мэргэжилтэн Макс Кункел тайлбарлажээ.

Өв залгамжлагч тэрбумтнууд эцэг эхээсээ илүү цэвэр эрчин хүч, хиймэл оюун ухаан зэрэг орчин үеийн бизнесүүдэд хөрөнгө оруулах хандлагатай байгаа нь UBS банкны тайлангаас харагдсан байна.

Эх сурвалж: CNN