Венесуэлийн эрх баригчид өнгөрсөн Ням гарагт хөрш Гайана улсын газар нутгийн гуравны хоёрыг өөртөө нэгтгэх асуудлаар ард иргэдийнхээ дунд санал хураалт зохион байгуулсан билээ.
Санал хураалтад Венесуэлийн 20.6 сая сонгогчийн 10.5 сая нь оролцсоны 95 хувь нь газар нутгаа өргөжүүлэхийг дэмжжээ.
Үүний дараа Венесуэлийн ерөнхийлөгч Николас Мадуро санал хураалтын үр дүнд үндэслэн авах арга хэмжээнүүдээ зарласан байна.
800,000 хүн амтай Гайана улсын Венесуэлтэй хил залгаа 160,000 км.кв нутгийг Эсекиба гэдэг. Ширэнгээр хучигдсан энэ нутагт газрын тосны том орд илэрч байжээ.
Мадурогийн гаргасан шийдвэрээр Венесуэлийн бүрэлдэхүүнд Гайана-Эсекиба нэртэй шинэ мужийг нэгтгэж, тус бүс нутгийн англи хэлтэй хүн амд Венесуэлийн иргэний үнэмлэх олгохоор болсон байна.
Бас Эсекибад цэргийн анги байрлуулах шийдвэр гаргаж, үндэсний компаниуддаа газрын тосны олборлолт явуулах зөвшөөрөл өгчээ.
“Гайана-Эсекиба мужийг багтаасан Венесуэл улсын шинэ газрын зургийг яаралтай хэвлүүлж, бүх сургууль, их сургууль, төрийн болон олон нийтийн байгууллага, айл өрхүүдэд тараах зарлигийг би гаргалаа. Энэ бол манай эх орны шинэ газрын зураг юм” гэж Мадуро мэдэгдсэн байна.
Венесуэл улс 1811 онд Испанийн колоничлолоос гарснаасаа хойш Эсекибагийн газар нутгийг өөрийн хэсэг гэж үзсээр ирсэн юм. Газар нутгийн маргааныг 1899 оны хилийн гэрээгээр тохиролцсон ч 1961 онд Гайана улс Их Британийн колоничлолоос гарснаас хойш дахин булаацалдах болжээ.
Ням гарагийн санал хураалтын өмнө НҮБ-ын дэргэдэх Олон Улсын Шүүх (IJC) энэ маргааныг даамжруулах алхам хийхгүй байхыг Венесуэлийн эрх баригчдад анхааруулж байв.
Гайана улсын ерөнхийлөгч Ирфаан Али саяхан ард түмэндээ хандаж телевизээр үг хэлэхдээ “Гайаны зэвсэгт хүчин өндөржүүлсэн бэлэн байдалд шилжлээ. Энэ бол Гайаны газар нутгийн бүрэн бүтэн байдал, тусгаар тогтнолд шууд заналхийлсэн үйлдэл юм” гэж мэдэгджээ.
Тэрбээр Карибын сав газрын орнуудын Caricom холбоо, АНУ, НҮБ-ын аюулгүй байдлын зөвлөлд хандаж, тусламж дэмжлэг хүссэнээ мэдэгдсэн байна.
“Ерөнхийлөгч Мадурогийн аюултай үйлдлийн талаар би НҮБ-ын ерөнхий нарийн бичгийн дарга болон хэд хэдэн орны удирдагчидтай утсаар ярилцаж, анхаарууллаа” гэж Али хэлсэн юм.
Тэрбээр бас гадаадын хөрөнгө оруулагчдад хандахдаа “Хууль засагладаг, ардчилсан, эрх чөлөөт улсад хөрөнгө оруулахад санаа зовох зүйл байхгүй. Манай түншүүд болон олон улсын хамтын нийгэмлэг биднийг дэмжихэд бэлэн байгаа. Бид хамтдаа Венесуэл улс болон ерөнхийлөгч Мадурогийн гаргасан алдааг засаж залруулах болно” гэж хэлжээ.
Мадуро 2024 оны ерөнхийлөгчийн сонгууль ойртож байгаатай холбоотойгоор нэр хүндээ өсгөх, сонгогчдын дэмжлэгийг авах, дотоодын хямралаас ард иргэдийн анхаарлыг сарниулахын тулд ийм арга хэмжээ авч байна гэж ажиглагчид үзэж байна.
Сүүлийн жилүүдэд Венесуэлийн олон нийтийн дунд сөрөг хүчнийхний нэр хүнд өсөж байгаа.
Лхагва гарагт Венесуэлийн ерөнхий прокурорын газар сөрөг хүчний 10 удирдагчийг баривчлах шийдвэр гаргасан байна.
Эх сурвалж: The Guardian
