Владимир Зеленский Аргентины шинэ удирдагч Хавьер Майлигийн тангараг өргөх ёслолд оролцсоныхоо дараа АНУ-д ажлын айлчлал хийнэ гэж Украины Ерөнхийлөгчийн Тамгын газраас мэдээллээ.
АНУ-д тэрээр Ерөнхийлөгч Жо Байдентай уулзана. "Владимир Зеленский АНУ, Европ болон дэлхийн улс орнуудын эв нэгдлийг хангахад анхаарлаа хандуулж, Украиныг Оросын терроризмоос хамгаалахад дэмжлэг үзүүлж, улс үндэстэн бүрийн бүрэн эрхт байдлыг хүндэтгэх, дүрэм журамд суурилсан олон улсын дэг журмыг бэхжүүлэхэд анхаарлаа хандуулах болно" гэж Зеленскийн ажлын албанаас мэдэгдэв.
Байден Зеленскийг 12-р сарын 12-ны мягмар гарагт Цагаан ордонд айлчлахыг урьсныг АНУ-ын Ерөнхийлөгчийн засаг захиргаа нотолжээ. Энэ мэдэгдэлд “Орос Украин руу нисгэгчгүй онгоц, пуужингаар довтолгоогоо эрчимжүүлж байгаа энэ үед Украины ард түмэнд чиглэсэн дэмжлэг гуйвашгүй гэдгийг онцлон харуулахын тулд ” урьсан гэж мэдэгджээ.
Цагаан ордон "Хоёр удирдагч Украины яаралтай хэрэгцээ болон энэ эгзэгтэй мөчид АНУ-ын дэмжлэг үзүүлэх нэн чухал ач холбогдлын талаар ярилцах болно" гэжээ.
Парламентын хоёр танхим дахь Бүгд найрамдах намынхан Киевт тусламж үзүүлэх асуудлыг АНУ-ын өмнөд хилийг хууль бус цагаачлалаас хамгаалах арга хэмжээнүүдтэй холбосноор АНУ-ын Сенат Украинд үзүүлэх 60 тэрбум гаруй долларын батлан хамгаалах тусламжийн шинэ багцыг энэ долоо хоногт баталж чадаагүй юм.
Өөрөөр хэлбэл, АНУ-ын Сенат өмнөд хилийн аюулгүй байдлын асуудлаарх маргааны улмаас Украин, Израиль, Тайваньд туслах хуулийн төслийг баталж чадаагүй юм.
Сенатад санал хураах өдөр Зеленский сенаторуудын бүлгийн хаалттай хуралдаанд оролцогчдод үг хэлэх ёстой байсан ч энэ маргааны улмаас видео илтгэлээ цуцалжээ.
Украины Ерөнхийлөгчийн Тамгын газар ням гарагт хийсэн мэдэгдэлдээ Зеленскийн айлчлалын гол сэдэв нь “Украин, АНУ-ын батлан хамгаалах салбарын хамтын ажиллагааг үргэлжлүүлэх, ялангуяа зэвсэг, агаарын довтолгооноос хамгаалах систем үйлдвэрлэх хамтарсан төслүүд байх юм. Мөн ирэх онд хоёр улсын хүчин чармайлтыг зохицуулах чиглэлээр ярилцана.
Эх сурвалж: Toim.mn