Нэтфликс компанийн бүтээх эртний Карфагены цэргийн жанжин Ханнибалын тухай баримтат кинонд жүжигчин Дензел Вашингтон тоглох болсон нь Тунисийн зарим иргэдэд таалагдахгүй байна.
Энэ нь жүжигчний арьсны өнгөтэй холбоотой маргаан юм.
Тунисийн хөрш Египет улсад бас саяхан Нэтфликсийн Клеопатра хатан хааны тухай бүтээлийн гол дүрийн жүжигчинтэй холбоотой ийм маргаан гарч байв.
Тунисийн хэвлэлд Нэтфликсийн жүжигчний сонголтыг “түүхийн гажуудал” хэмээн шүүмжилж, онлайн орчинд үүсгэсэн эсэргүүцлийн хөдөлгөөнд 1,300 орчим хүн нэгджээ.
Өнөөдрийн Тунис улсын газар нутагт эрт цагт Карфаген улс оршин тогтнож байв. Тус улсын цэргийн жанжин Ханнибал нийтийн тооллын өмнөх 218 онд Ромын эзэнт гүрний эсрэг аян дайн явуулж байсан юм.
Заан хөлөглөсөн Карфагены цэргүүд Альпын нурууг давж, Ромыг хойд талаас нь эзлэхээр 15 жилийн турш дайтсан ч амжилт ололгүй буцаж байжээ.
Ханнибалын арьсны өнгө ямар байсан талаар түүхэн баримт олдоогүй юм. Түүхчдийн олонх нь түүнийг одоогийн Ливан, Сирийн нутагт амьдарч байсан Финикүүдийн удам гэдэгтэй санал нийлдэг.
Нэтфликс Ханнибалын дүрд Вашингтоныг тоглуулахаар сонгосны дараа Тунисийн парламентын гишүүн Яссин Мами соёлын сайддаа хандан асуулга тавьж байв.
“Танай яам энэ асуудлаар байр сууриа илэрхийлэх хэрэгтэй. Энэ бол Тунис үндэстний өвөрмөц хэв шинжийг хамгаалах, иргэний нийгмийн дуу хоолойг сонсох тухай асуудал юм” гэж тэр хэлж байжээ.
Харин соёлын сайд Хайет Кетат Гурмази жүжигчний сонголтод нөлөөлөхийн оронд энэхүү түүхэн бүтээлийн зарим зургийг Тунисийн нутагт авхуулах талаар Нэтфликстэй ярилцаж байгааг энэ үеэр дуулгасан юм.
“Энэ бол зохиол. Энэ бол тэдний эрх. Хэдийгээр бид тунис хүн гэж бахархдаг ч Ханнибал бол түүхэн хүн. Бид юу хийж чадах юм бэ? Ядаж зургийн нэг хэсгийг нь Тунист авхуулах, улсынхаа нэрийг гаргах нь л надад хамаатай гэж би бодож байна. Бид Тунисийг гадаадын кино урлагийн платформ болгохыг л хүсэж байна” гэж тэр ярьжээ.
Эх сурвалж: The Guardian