Өмнөд Солонгосын газар, дэд бүтэц, тээврийн яам өчигдөр орон сууцны барилгын давхар хоорондын дуу тусгаарлалтын стандартыг хэрэгжүүлэх шинэчилсэн журмын талаар мэдээлжээ.
Хэрвээ энэ стандартыг хангаагүй бол эрх баригчид тухайн барилгыг хүлээж авахаас татгалзах боломжтой болж байгаа юм байна.
Одоогийн зохицуулалтаар дуу тусгаарлах стандартыг хангаагүй барилгыг гүйцэтгэгчээр нь албадан засварлуулах боломжгүй, зөвхөн зөвлөмж өгөөд орхидог ажээ.
Харин шинэ журмын дагуу барилга баригдах явц дунд чанарыг нь шалгаад стандарт хангаагүй бол хүлээж авахаас татгалзахыг урьдчилан анхааруулдаг болж байгаа юм байна.
Үүнээс гадна тухайн барилгын 2 хувьд чанарын шалгалт явуулдаг байсныг 5 хувь болгон нэмэгдүүлж, давхар хоорондын бүтцийн зузааныг 4 см-ээр нэмэгдүүлж, сайн чанарын зөөлөвч материал заавал оруулах журамтай болжээ.
Шинэ журмын хүрээнд төрийн өмчит Korea Land & Housing корпорац орон сууцны зориулалттай бүх барилгуудад 2025 оноос эхлэн нэгдүгээр зэрэглэлийн (grade-1) шалны стандартыг нэвтрүүлэхээр болсон байна.
Айл хоорондын дуу чимээнээс үүдэлтэй маргаан зөрчил иргэдийн дунд байнга гарч, зарим хүндэрсэн тохиолдолд хүний амь нас үрэгдэж байсан тул Өмнөд Солонгосын засгийн газар ийм арга хэмжээ авахаар болжээ.
Эх сурвалж: Yonhap News