Европын Холбооны удирдагчид өчигдөр Брюссель хотод чуулахдаа Украин улсыг гишүүнээр элсүүлэх яриа хэлэлцээг эхлүүлэх гэнэтийн шийдвэр гаргалаа.
Гэнэтийн гэсний шалтгаан нь Унгарын ерөнхий сайд Виктор Орбан уг шийдвэрт саад учруулахаа олон өдрийн өмнөөс амлаж байсан юм.
Ийм шийдвэр гаргахад Европын Холбооны бүх гишүүн улсын бүрэн дэмжлэгийг авах ёстой байдаг.
Санал хураалтын үеэр Орбан танхимаас гарч явсан тул Унгарыг “түдгэлзсэн” гэж тооцсон байна. Ийнхүү эсэргүүцсэн санал гараагүй тул шийдвэр гарчээ.
Ийм аргаар чухал шийдвэр гаргаж байсан түүх Европын Холбоонд байхгүй юм.
Украинтай цуг Молдов улсыг мөн гишүүнээр элсүүлэх яриа хэлэлцээг эхлүүлэхээр болжээ.
“Энэ бол Украины ялалт. Бүх Европын ялалт. Урам зориг өгч, хүч өгсөн ялалт” хэмээн Украины ерөнхийлөгч Володимир Зеленский шийдвэрийг талархан хүлээж авч байгаагаа илэрхийлсэн байна.
Бараг хоёр жилийн турш Оросын эзлэн түрэмгийлэгчидтэй тэмцэж буй Украинд Өрнөдийн холбоотнуудын дэмжлэг маш чухал байгаа. АНУ-ын ерөнхийлөгч Байдены засаг захиргаа одоо Украинд үзүүлэх $60 тэрбумын тусламжийн багцыг Конгрессоор дэмжүүлэхээр шаргуу ажиллаж байна.
Европын Комиссын ерөнхийлөгч Урсула фон дер Ляйен санал хураалтын үр дүнг “стратегийн шийдвэр, үүнийг баталсан өдөр манай түүхэнд тод бичигдэн үлдэх болно” гэж мэдэгджээ.
“Унгарын байр суурь тодорхой. Украин улс Европын Холбооны гишүүнээр элсэх яриа хэлэлцээ эхлэхэд бэлэн биш гэж бид үзэж байна. Гэхдээ 26 гишүүн улс ийм шийдвэр гаргах ёстой гэсэн хатуу байр суурьтай байсан тул Унгар улс энэ шийдвэр гаргалтад оролцохыг хүссэнгүй” гэж Виктор Орбан мэдэгдсэн байна.
Европын Холбоо нийт 27 гишүүн улстай.
Шинэ гишүүн элсүүлэх яриа хэлэлцээ нь хэдэн жил үргэлжлэх урт үйл явц юм.
Украин бол 44 сая хүн амтай, газар нутгийн хэмжээ нь Европын Холбооны аль ч улсынхаас том.
Санал хураалтын өмнө Францын ерөнхийлөгч Эммануэл Макрон, Германы канцлер Олаф Шольц нар эрчимтэй дипломат ажиллагаа явуулж, Унгарын ерөнхий сайдтай биечлэн уулзацгаасан юм.
Лхагва гарагт Европын Комисс шүүх засаглалын хараат бус байдлыг хангах Унгарын эрх баригчдад тавьсан шаардлага биелсэн гэж үзээд эдийн засгийн төслүүдэд нь зориулах 10.2 тэрбум еврогийн санхүүжилтийг зөвшөөрсөн байна.
Эндээс харвал Европын удирдагчид санал хураалтад саад хийлгэхгүй байхаар Орбантай тохиролцсон бололтой.
Өчигдөр бас Гүрж улсад Европын Холбооны гишүүнд горилогчийн статус олгож, Босни Херцеговин улсад тодорхой шаардлага хангасан нөхцөлд статус олгохоор шийдвэрлэсэн байна.
Эх сурвалж: Reuters