Пүрэв гарагийн орой ОХУ-ын ерөнхийлөгч Владимир Путиний оны сүүлээр ард иргэдийнхээ асуултад утсаар шууд хариулдаг уламжлалт арга хэмжээ зохион байгуулагдсан юм.
Энэ үеэр тэр Украинд явуулж буй “цэргийн тусгай ажиллагаа” зорилгоо биелүүлэх хүртэл зогсохгүй, Өрнөдийн эдийн засгийн хоригийг Орос улс амжилттай даван туулж буй талаар ярьсан байна.
Путин бас сүүлийн үед үнэ нь хяналтаас гарсан хүнсний гол бүтээгдэхүүн болох өндөгний асуудлыг ч хөнджээ.
Ирина Акопова нэртэй тэтгэврийн өндөр настан ерөнхийлөгчөөсөө өндөг, тахианы махны үнийг буулгаж өгөхийг хүссэн байна.
Росстат статистикийн төв байгууллагын мэдээлснээр Оросын зах зээлд өндөгний үнэ сүүлийн нэг жилийн дотор 40 гаруй хувиар өссөн юм.
“Би үүнд уучлал гуймаар байна. Гэхдээ энэ бол засгийн газар муу ажилласны үр дүн” гэж Путин өндөр настны асуултад хариулахдаа хэлжээ.
Дотоодын үйлдвэрлэл нь эрэлтээ гүйцэхгүй байгааг хүлээн зөвшөөрсөн тэрбээр “Нөхцөл байдал ойрын үед сайжрахыг би амлаж байна” гэж хэлсэн юм.
Оросын засгийн газар 2024 оны эхний зургаан сарын хугацаанд импортын татварыг чөлөөлөх замаар гадаадаас 1.2 тэрбум ширхэг өндөг авахаар төлөвлөөд байгаа.
Гэхдээ тус улсын жилийн инфляц өнгөрсөн арваннэгдүгээр сарын байдлаар 7.4 хувьд хүрсэн нь байдлыг хүндрүүлж байна.
Оны сүүлээр инфляц 8 хувь давах нь тодорхой болсныг Путин өчигдөр хэлжээ. Энэ нь Оросын Төв Банкны тавьсан 4 хувийн зорилтоос хоёр дахин өндөр гэсэн үг.
Хэдийгээр олон улсын банк санхүүгийн байгууллагууд Оросын эдийн засгийн ирээдүйг тааруу үнэлж байгаа ч Путин өчигдөр улс орон нь шинэ өсөлтийн үе шатандаа орсныг баталсан байна.
Эх сурвалж: Business Insider