ОХУ-ын ерөнхий сайд Михаил Мишустиний БНХАУ-д хийх хоёр өдрийн айлчлал Мягмар гарагт эхэлж байгааг Москвагийн албаны эх сурвалж өчигдөр орой мэдээлжээ.
“2023 оны арванхоёрдугаар сарын 19-20-ны өдрүүдэд Оросын ерөнхий сайд Михаил Мишустин харилцан тохиролцсоны дагуу Хятад улсад айлчилна” гэж дээрх мэдэгдэлд өгүүлсэн байна.
Айлчлалын үеэр тэр Бээжин хотод болох Орос, Хятадын засгийн газрын тэргүүн нарын 28 дахь удаагийн уулзалтад оролцож, БНХАУ-ын дарга Ши Жиньпинд бараалхаж, төрийн зөвлөлийн ерөнхий сайд Ли Чянтай хэлэлцээ хийх гэнэ.
Энэ үеэр хоёр улсын худалдаа, эдийн засгийн хамтын ажиллагаа, хамтарсан томоохон төслүүдийн талаар хэлэлцэх ажээ.
ОХУ-ын засгийн газраас гаргасан мэдэгдэлд хоёр улсын худалдааны хэмжээ 2023 оны сүүлээр анх удаа $200 тэрбумд хүрч буйг онцолсон байна. Энэхүү худалдааны төлбөрийн 90 гаруй хувийг рубль, юаниар гүйцэтгэснийг мэдээлжээ.
Үүн дотроо Оросоос Хятадад нийлүүлэх эрчим хүчний экспортын хэмжээ өсөж байгааг онцолсон байна.
Тухайлбал Орос улс Хятадын газрын тосны хамгийн том нийлүүлэгч, нүүрсний хоёр дахь том нийлүүлэгч, шингэрүүлсэн байгалийн хийн гурав дахь том нийлүүлэгч болсныг мэдэгджээ.
Үүнд “Сибирийн хүч” дамжуулах хоолойгоор нийлүүлэх байгалийн хийн хэмжээ тасралтгүй өсөж байгаа, Монголоор дайрах хоёр дахь хоолойн төсөл хэрэгжиж байгааг Оросын засгийн газрын мэдэгдэлд дурдсан байна.
Эх сурвалж: ТАСС
