Персийн буланд оршдог гурван арал Иран улсын захиргаанд байдаг ч Арабын Нэгдсэн Эмират Улс өөрийн газар нутаг гэж маргадаг юм.
Өнгөрсөн долоо хоногт ОХУ-ын засгийн газар Арабын орнуудтай хамтарсан мэдэгдэл гаргахдаа дээрх арлуудын маргааныг “энх тайвнаар шийдвэрлэх”-ийг дэмжсэн байр суурь илэрхийлсэн нь Тегераны эрх баригчдыг хилэгнүүлжээ.
Ираны гадаад хэргийн яам Бямба гарагт Тегеран дахь ОХУ-ын элчин сайдын яаманд дээрх мэдэгдэлтэй холбогдуулан эсэргүүцэл илэрхийлсэн байна.
“Исламын Бүгд Найрамдах Иран Улс энэ асуудлаар аль ч талаас гаргасан аливаа маргааныг эрс няцаах бөгөөд хүлээн зөвшөөрөх боломжгүй юм” гэж яамны мэдэгдэлд өгүүлжээ.
Ираны гадаад хэргийн сайд Хоссейн Амир-Абдуллахиан өнгөрсөн Баасан гарагт ОХУ-ын гадаад хэргийн сайд Сергей Лавровтой утсаар ярихдаа гурван арал нь “Ираны нутаг дэвсгэрийн салшгүй хэсэг” болохыг мэдэгдсэн байна.
“Нутаг дэвсгэрийн бүрэн бүтэн байдлын асуудлаар Тегеран аль ч талд буулт хийхгүй” гэж гадаад хэргийн сайд энэ үеэр анхааруулжээ.
Персийн булангийн Их, Бага Тунб болон Абу Муса арлууд нь дэлхийн газрын тосны үйлдвэрлэлийн 20 хувь дамжин өнгөрдөг Ормузын хоолойн ойролцоо байрладаг тул стратегийн чухал ач холбогдолтойд тооцогддог юм.
Эх сурвалж: AFP
