Өчигдөр буюу Мягмар гарагт Сербийн нийслэл Белград хотын төвд дахин олон мянган хүн цугларч, энэ сарын дундуур болсон парламентын сонгуулийн үр дүнг цуцлахыг эрх баригчдаас шаарджээ.
“Серби Хүчирхийллийн Эсрэг” сөрөг хүчний эвслээс зохион байгуулсан тэмцэл ес дэх өдрөө үргэлжилсэн нь энэ юм.
Арванхоёрдугаар сарын 17-ны өдөр болсон парламентын болон орон нутгийн сонгуульд ерөнхийлөгч Александр Вучичийн эрх баригч Сербийн Дэвшилтэт Нам бүх түвшинд ялалт байгуулснаа зарласан.
Гэвч сөрөг хүчний эвсэл уг сонгуулийг будилаантай болсон гэж үзэж байгаа.
Өчигдрийн жагсаал Сербийн дээд шүүх болон ерөнхий прокурорын газар байрладаг ордны гадаа зохион байгуулагдсан юм.
Жагсагчид 24-ний өдөр баривчлагдсан хүмүүсийг суллахыг энэ үеэр шаарджээ.
Тухайн өдөр бараг 40 орчим жагсагчийг цагдаа нар баривчилсан юм. Мөргөлдөөний үеэр найман цагдаагийн ажилтан бэртсэн тухай эрх баригчид мэдээлж байв.
Тухайн өдрийн мөргөлдөөнийг засгийн газрын илгээсэн хутган үймүүлэгчид өдөөсөн гэж сөрөг хүчний эвсэл үзэж байна.
Жагсаалаас гадна Сербийн сөрөг хүчний гол намын төлөөлөгч Мариника Тепич тэргүүтэй таван хүн сонгуулийн үр дүнг цуцлахыг шаардан өлсгөлөн зарлаад байгаа. Хэдийгээр эрүүл мэнд нь муудсан ч өлсгөлөнгөө зогсоохгүйг тэр өчигдөр мэдэгджээ.
Эрх баригч нам сонгуульд ялахын тулд нас барсан хүмүүсийн бүртгэлийг ашигласан, Босни Херцеговин зэрэг бусад хуучин Югославын бүрэлдэхүүнд байсан орнуудаас серби үндэстнүүдийг авчирч санал өгүүлсэн гэж сөрөг хүчнийхэн үзэж байна.
Европын Аюулгүй Байдал, Хамтын Ажиллагааны Байгууллага (OSCE) болон бусад олон улсын байгууллагууд энэ удаагийн сонгуулийн үеэр хэд хэдэн зөрчил илэрсэн гэж үзэж байгаа.
Сербийн төрийн бус байгууллагууд ч үүнийг хүлээн зөвшөөрч байна. АНУ-ын төрийн департамент сонгуулийн үеэр гарсан зөрчлүүдийн мөрөөр OSCE байгууллагатай хамтран шалгахыг Сербийн эрх баригчдад уриалжээ.
Ерөнхийлөгч Вучичийн засгийн газар ОХУ-тай найрсаг харилцаатай гэдгээрээ танигдсан.
Тиймээс Сербид болж буй үйл явдалд ОХУ-ын эрх баригчид бас байр сууриа илэрхийлсэн байна.
Өчигдөр ОХУ-ын гадаад хэргийн яамны хэвлэлийн төлөөлөгч Мария Захарова мэдэгдэлдээ Өрнөдийнхөн заавал “Оросоос өөр сонголт” хийхийг Сербийн талд хүчээр тулгаж байгааг шүүмжилжээ.
Эх сурвалж: AFP
