Даваа гарагийн үдээс хойш Японы төв бүсийн баруун эрэг дагуу нутагт 7.6 магнитудын хүчтэй газар хөдөлж, цүнамигийн эрсдэл үүссэн билээ.
Энэ газар хөдлөлтийн дараа 50 орчим чичиргээ бүртгэгдсэн байна. Газар хөдлөлтийн төв цэг Ишикава мужийн Важима хотоос зүүн хойд зүгт 30 км зайтай, газрын гадаргаас 16 км гүнд байсныг тогтоожээ.
Японы цаг уурын хүрээлэн Ишикава мужийн Ното хойг орчимд 3-аас дээш метрийн өндөр цүнами үүсэж болзошгүйг эхлээд анхааруулсан ч сүүлд анхааруулгаа цуцалжээ.
2011 онд Фүкүшимад болсон 9 магнитудын хүчтэй газар хөдлөлтийн үеэр хамгийн сүүлд ийм цүнамигийн түгшүүр зарлаж байсан гэнэ.
Гамшгийн төв болсон Ишикава мужид дөрвөн хүн барилгын нурангид дарагдаж амиа алдсаныг Мягмар гарагийн өглөө орон нутгийн захиргаа мэдээлсэн байна. Ишикава болон бусад мужуудад нийтдээ 30 орчим хүн бэртэж гэмтжээ. Нуранги дороос хүмүүсийг аврах ажиллагаа үргэлжилж буй тул хохирлын тоо нэмэгдэж болзошгүй гэнэ.
Газар хөдлөлтийн үеэр хуучны модон байшин барилгууд нурж, гал түймэр гарсан байна. Тухайлбал Важима хотод 10 орчим байшинд түймэр гарсныг мэдээлжээ.
Ишикава мужид нийт 32,500 өрх цахилгаан хангамжгүй болсон байна.
Газар хөдлөлтийн чичиргээ өмнөд Кюшү арлаас эхлээд хойд Хоккайдо арал хүртэл өргөн уудам газар нутагт мэдрэгджээ.
Япон улс газар хөдлөлтийн хүчийг долоон түвшинтэй хэмжүүрээр хэмждэг бөгөөд энэ удаагийн хөдлөлтийг хамгийн өндөр түвшинд бүртгэсэн байна. Энэ түвшинд хүмүүс хөл дээрээ зогсох боломжгүй гэж үздэг.
Хамгийн сүүлд 2018 онд Хоккайдо аралд ийм түвшний газар хөдлөлт бүртгэгдэж байжээ.
Өчигдрийн газар хөдлөлтийн үеэр есөн мужийн 97,000 орчим иргэнийг нүүлгэн шилжүүлэх захирамж гарсан байна.
JR East төмөр замын компани Тохокү, Жоецү, Хокурикү чиглэлийн үйлчилгээгээ түр зогсоож, ANA, Japan Airlines компаниуд нийт 25 нислэгээ цуцалжээ.
Японы цаг уурын хүрээлэн энэ удаагийн гамшгийн төв болсон нутагт ойрын нэг долоо хоногийн дотор дахин ижил хэмжээний хүчтэй газар хөдлөлт давтагдаж болзошгүйг анхааруулсан байна.
Өчигдрийн газар хөдлөлтийн дараа Өмнөд ба Умард Солонгос улсуудын зүүн эрэгт цүнамигийн түгшүүр зарлажээ.
ОХУ-ын эрх баригчид бас Сахалин арлын баруун эрэг дагуу цүнами үүсэж болзошгүйг орон нутгийн иргэдэд анхааруулсан байна.
Эх сурвалж: Kyodo News
