Украины дайнтай холбогдуулан Европын Холбоо өчигдөр ОХУ-ын төрийн өмчит алмааз олборлогч Алроса компани болон түүний гүйцэтгэх захирлын эсрэг хориг арга хэмжээ зарлалаа.
Ингэснээр Алроса компанийн бүтээгдэхүүнийг Европын Холбооны гишүүн 27 улсад хориглож, гүйцэтгэх захирал Павел Маринычевт визийн хориг тавьж, хөрөнгийг нь битүүмжлэх юм.
Алроса нь Оросын алмааз олборлолтын 90 хувийг гүйцэтгэдэг, салбартаа дэлхийн хамгийн том компани ажээ.
ОХУ-ын алмаазын экспортын орлого 2022 онд $4 тэрбумд хүрч байв.
Үүнээс гадна гуравдагч улс оронд боловсруулсан Оросын алмаазын эсрэг хориг есдүгээр сараас эхлэн шат дараатай хэрэгжихээр болжээ.
Их Долоогийн бүлгийн орнууд Оросын алмаазын худалдааг хянах системийг хэрхэн бий болгох талаар тохиролцоонд хүрэхэд олон сарын хугацаа зарцуулсан юм.
Хоригийг үр дүнтэй хэрэгжүүлэхэд ийм систем зайлшгүй шаардлагатай гэж дэлхийн алмааз худалдааны хамгийн том төв Бельги улсын эрх баригчид үзэж байв.
Украинд эзлэн түрэмгийлэх дайн эхэлснээс хойш Европын Холбоо нийт 12 ээлжийн хориг арга хэмжээг ОХУ-ын эсрэг авч хэрэгжүүлээд байна.
Эх сурвалж: AFP
