Завханы гэх тодотголтой Ардын жүжигчин С.Батсүхийн талаар сүүлийн үед таагүй мэдээлэл гараад байгаа билээ. Тодруулбал, бяцхан шавь Б.Бат-Энэрэлийгээ "хаясан" өөр бяцхан шавьтай болж тоохоо больсон зэрэг таагүй мэдээллийг Б.Бат-Энэрэлийн ээж цахим сүлжээнд тавьсан байв. Тэгвэл эдгээр мэдээллүүдтэй холбоотой асуудалд ам нээвэл уушги нээ гэдэг шиг тодорхой тайлбарыг Ардын жүжигчин өгчээ.

Тэрбээр "Олон хүн надруу холбогдоод асуугаад байгаа учраас тайлбар хийе. Бат-Энэрэлийн ээж янз бүрээр бичээд байх юм. Олон нийтийн сүлжээнд хувийн амьдрал хэрүүл маргаан тавиад байх дургүй. Хүн чанар мөн чанараа алдахгүй явах юмсандаа. Миний хамгийн дургүй үг "Чи хэзээ ийм байсан юм бэ" гэдэг үгэнд их дургүй. Хүн алдаж онож явдаг. Алдаа гаргадаггүй хүн гэж байхгүй. Би ч гэсэн зөндөө алдаа гаргаж байсан. Алдаанаасаа суралцаад явж ирсэн.

Өдий насны хүн залуучууддаа зөв зүйлийг үлгэр дуурайлал үзүүлээд явах хэрэгтэй гэж боддог. Би шавь нартаа багшилдаггүй. Харин тэд миний үйл хөдлөл, ааш араншингаас суралцаад явдаг.

Бат-Энэрэл хүүхдийн төвд хандана гэсэн байна билээ. Хэтэрхий хүүхэд хайрлаад байна гэж хандах гэж байгаа биздээ. Эсвэл өөрийнхөө дагагчийг өсгөх гэж албаар ингээд байгаа юм болов уу гэж гайхаж байна. Бараан бүгээн зүйл тавьж хандалт авч дагагчаа өсгөдөг зүйл ард хоцорсон.

Өөрийгөө биш бусдыг хайрлаж байж хүн урагшаа явах ёстой. Би хүнтэй муудалцдаггүй. Юманд хэмжээ хязгаар гэж бий. Монгол Улс хуультай. Нэр төрөө сэргээлгэх зүйл надад байж болно. Гэхдээ би тэгэхгүй. Монголчууд намайг мэднэ. Миний амьдрал цагаан цаасан дээр тод байгаа. Монголчуудаас юугаа ч нуухгүй ээ. Хамгийн хайртай хүмүүстээ муухай ааш араншингаа гаргаж л явж байсан.

Гэхдээ өөрийнхөө хүн чанар мөн чанараа алдахгүй юмсан. Одоо Бат-Энэрэл болон ээжтэй харьцаад явах шаардлага байхгүй юм байна. Бүр салхин доогуур нь гарахаас ч сэжиг хүрч эхэлдэг юм байна шүү. Ёстой буянаараа болог. Хүүхдийнх нь тоглолт болох гэж байгаа юм билээ. Би тултал нь хийж өгнө гэж бодсон.

Одоо надтай ярих гээд хэрэггүй дээ. Надад зүрх сэтгэл гэж бий. Миний ханийг их муухайгаар гомдоосон юм билээ. Хэтэрхий их хайрлаж байсан шүү. Гэтэл хайрлаж хүндэлж явсан хүн урдаас ус цацахаар хэцүү дээ. Би ханьдаа буруу өгөхгүй. Намайг ямар байхад миний хань ямар хэмжээнд авчирч, өнөөдрийг хүртэл ингээд дуулуулаад явж байхад энэ хүний нөлөө их бий шүү дээ.

Надаас авах сайхан чанар бий. Тиймээс залуусыг эзэн хичээвэл заяа хичээнэ гэдгээр зарчмаар яваасай. Би бол төрийнхөө хайр хишгийг хангалттай хүртэж яваа юм шүү. Сайхан хүмүүсийнхээ дунд сайн сайхан амьдарч байна. Олон нийтийн сүлжээнд шалчигнаад яваад байх шаардлага байхгүй. Аргагүй эрхэнд ийм тайлбар хийж байна, та бүхэн минь авах гээхийн ухаанаар хандаарай, уучлаарай" гэж тайлбар хийжээ.