Нэгдүгээр сард хүйтний эрч чангарсны улмаас Орос улс даяар нийтийн аж ахуйн байгууламжуудад осол гэмтэл нэмэгдэж, иргэдийн цэвэр ус, дулаан хангамж тасалдах болжээ.

Зөвхөн өчигдөр буюу Мягмар гарагт Саратов, Ханты-Мансийн автономит тойрог, Владимир, Пенза хотууд олон Москвагийн ойролцоох Солнечногорск, Кузнецк, Железнодорожный зэрэг хотуудад орон сууцны дулаан хангамж тасалдсан тухай мэдээ гарсан байна.

Свердловск мужийн Ключевск хотод цахилгааны ослын улмаас бойлер ажиллагаагүй болсон тул халаалтгүй болсон зургаан орон сууцны оршин суугчдыг хотын дарга Зарница хүүхдийн зусланд түр нүүлгэх шийдвэр гаргажээ.

Энэ сарын хамгийн том гэмтэл Москва мужид нэгдүгээр сарын 2-ны өдөр гарсан юм. Тус мужийн Балашиха хотод орон сууцны 26 байр халаалтгүй болсныг 3-4 хоногийн дараа сэргээжээ.

Нэгдүгээр сарын 4-ний өдөр Подольскийн Климовск дүүрэгт дулааны шугам хагарсны улмаас 20,000 орчим хүн халаалтгүй болсон байна.

Энэ үеэр орон сууцны дотоод температур 5 хэм хүртэл буурсныг иргэд мэдээлжээ.

Маргааш нь хэсэг иргэд дулаан өгөхийг эрх баригчдаас шаардан төв талбайдаа цугласан байна.

Климовскийн хайрцгийн үйлдвэрийн уурын зууханд гарсан ослын улмаас дулаан хангамж тасалджээ.

Ерөнхийлөгч Путин энэ асуудалд анхаарлаа хандуулж, нөхцөл байдлыг хяналтдаа авсан талаар мэдэгдсэн юм. Мөрдөн байцаалт явуулахад орон нутгийн эрх баригчид хэт ачааллын улмаас дулаан тасалдсан гэж худал тайлбарлаж байсныг тогтоожээ.

Ингээд иргэдэд үйлчилгээ үзүүлэхдээ аюулгүй байдлын шаардлага хангаагүй үндэслэлээр тэдэнд эрүүгийн хэрэг үүсгэсэн байна.

Улмаар хотын даргын орлогч, уурын зуухын дарга нарыг цагдан хорьжээ.

Энэ явдлын дараа Путин осол гарсан үйлдвэрийг төрийн өмчид авах тушаалыг холбогдох албаныханд өгсөн байна.

Гэвч Климовск дүүргийн 7,000 гаруй хүн амьдардаг 90 орон сууц одоо ч халаалтгүй хэвээр байгаа ажээ.

Эрх баригчид эдгээр иргэдээс нэгдүгээр сарын 4-нөөс хойших халаалтын төлбөрийг авахгүй болсныг мэдэгдсэн байна.

2023 онд Оросын хэвлэл мэдээллийн хэрэгслээр нийтийн аж ахуйн осол гэмтлийн талаар 4,900 гаруй мэдээ цацагдсан нь дайны өмнөх 2021 оныхоос бараг хоёр дахин нэмэгджээ.

Тухайлбал 2022 онд 3,200, 2021 онд 2,900 орчим гэмтэл саатал гарч байсан байна.

“Одоо Брежневийн үед байгуулсан сүлжээний элэгдэл эхэлж байна. 10 жилийн өмнө бид Хрущевын үеийн дэд бүтцийн элэгдлийг ярьдаг байсан бол одоо Брежневийн үеийнх эрс нэмэгдлээ” гэж хот төлөвлөлтийн мэргэжилтэн Петр Иванов тайлбарлажээ. Осол гэмтэл гарах бүрд нөхөн засварлах арга хэмжээ авдаг бол бүрэн хэмжээний дэд бүтцийн шинэчлэлт Орос даяар ганц ч удаа хийгдээгүйг тэр батлан ярьсан байна.

2024 оны эхний долоо хоногт Оросын бүс нутгуудад хэдэн арван осол гэмтэл гарсан юм.

Москва мужийн арав гаруй зуслангийн тосгон сууринуудад дулааны хангамж тасалдсан бол Лотошино дүүрэгт нэгдүгээр сарын 7-нд шугамын гэмтлийн улмаас халаалт, халуун ус тасалдаж, эрх баригчид хоёр дахь өдрөөс эхлэн айлуудад цахилгаан халаагуур тараажээ.

Москвагаас зүүн өмнө зүгт орших Литкарино хотын оршин суугчид нэгдүгээр сарын 7-нд бас халаалтгүй болсон юм.

Энэ үеэр иргэд хашаандаа мод, барилгын хаягдал шатааж байсан нь дулаацахаас гадна эрх баригчдын анхаарлыг асуудалд хандуулах зорилготой байжээ.

Мөн Павловский Посад, Тарасово, Кузнецы, Носырево болон Заозерье, Солнечногорске, Люберцы, Электросталь, Тройцк, Ногинск, Лобня, Воронеж, Волгоград хотууд, Ярославль, Тюмень, Ленинград мужуудад халаалт тасарсан тухай хэвлэлүүд мэдээлсэн юм.

Чувашийн Толиково сууринд нэгдүгээр сарын 8-нд халуун, хүйтэн усгүй болсноос оршин суугчид нь цас хайлуулан хэрэглэж байжээ.

Эх сурвалж: The Moscow Times