Хойд Солонгосын удирдагч Ким Чен Ун 40 нас хүрч байна. Эсвэл үгүй ч байж мэднэ. Энэ улсын дээд удирдагчийн төрсөн өдрийг 1-р сарын 8 гэж үздэг ч яг төрсөн он сар өдөр нь тодорхойгүй хэвээр байна. Энэ нь Кимтэй холбоотой цорын ганц оньсого биш бөгөөд 2011 онд засгийн эрхэнд гарсан Хойд Солонгосын удирдагчийн талаар тодорхой хариултгүй таван асуулт бий.
1. Ким Чен Ун хэзээ төрсөн бэ?
Хойд Солонгосын судалгаагаар мэргэшсэн Оксфордын их сургуулийн багш доктор Эдвард Хоуэлл “Түүнийг 1982, 1983, 1984 онд төрсөн эсэх талаар маш их маргаан байдаг” гэжээ.
1-р сарын 8 буюу Кимийн төрсөн өдрийг Хойд Солонгост ямар ч байдлаар тэмдэглэдэггүй, энэ бол ердийн ажлын өдөр юм. Харин түүний эцэг Ким Чен Ирийн төрсөн өдрийг жил бүрийн 2-р сарын 16-нд "Гэрэлт оддын өдөр" болгон тэмдэглэдэг.
Өвөө Ким Ир Сений төрсөн өдрийг дөрөвдүгээр сарын 15-нд мөн Нарны өдөр болгон тэмдэглэдэг. Кимийн хамаатан садны тухайд бүр ч тодорхой бус. Кимийг эцэг нэгтэй ах нартай гэдэг нь мэдэгддэг. Тэдний нэг Ким Чен Нам 2017 онд Малайзад алагджээ.
Ким Чен Уны аавыг дор хаяж дөрвөн өөр хамтрагчтай байсан гэж үздэг ч түүний гэр бүлийн харилцаа олны анхаарлын төвд байсангүй. Ким Чен Уны ээж Ко Ён Хи нь Японд төрсөн бөгөөд 1960-аад онд Хойд Солонгост бүжигчнээр ажиллахаар иржээ. Тэрээр бүжигчин мэргэжилтэй, япон гаралтай. Түүнчлэн Ким Чен Ир бүх найз бүсгүйчүүдээсээ түүнд хамгийн хайртай байсан гэлцдэг.
2. Ким Чен Уны эхнэр хэн бэ?
Түүнийг Ри Сол Жү гэх эхнэртэй гэдгийг бид мэднэ, гэхдээ тэд хэзээ гэрлэснийг мэдэхгүй. Магадгүй, энэ нь 2009 он байж мэдэх юм. Зарим мэдээллээр Ким Ри Сол Жүг хөгжмийн тоглолт дээр олж харсан, анхаарлыг нь татсан дуучин байж магадгүй гэлцдэг. Энэ талаар баттай баталгаа алга.
Тагнуулын зарим мэдээллээр Ри Сол Жу 2005 онд Азийн хөнгөн атлетикийн аварга шалгаруулах тэмцээнд оролцох Хойд Солонгосын хөгжөөн дэмжигч багийн бүрэлдэхүүнд багтаж Өмнөд Солонгост айлчилж, Хятадад дууны урлагийн чиглэлээр суралцаж байжээ. БНАСАУ энэ эмэгтэйг Кимийн эхнэр гэхээс өөр ямар ч мэдээлэл өгөөгүй байна.
3. Ким Чен Ун хэдэн хүүхэдтэй вэ?
Ким Чен Ун охин Ким Жу Э-гийн хамт
Яг тодорхой хэлэхэд хэцүү. Ри Сол Жу жирэмсэн болсон тухай таамаг түүнийг 2016 онд олны нүдэнд харагдахаа больсон цагаас хойш эхэлсэн. Гэхдээ үүнийг хэн ч албан ёсоор батлаагүй байна. Өмнөх хоёр хүүхэд нь 2010, 2013 онд төрсөн гэдгээс өөр тодорхойй мэдээлэл үгүй. Тэдний хүйс, тэдний дунд Ким-ийн хүчирхэг өв залгамжлагч байгаа эсэх нь бүр ч тодорхойгүй.
Хойд Солонгосын удирдагчийн хоёр дахь хүүхэд 10 орчим настай бөгөөд бидний хамгийн сайн мэддэг охин Ким Жу Э аавынхаа хамт олны өмнө гарч ирсэн нь олны анхааралд илүүтэй өртсөн. Тэрээр 2023 онд дор хаяж таван удаа олны өмнө гарчээ. Ким Чен Уны дотны найз Америкийн сагсан бөмбөгийн од асан Деннис Родман 2013 онд нэгэн ярилцлагадаа охины нэрийг дурдсан байдаг.
"Тэр өөр хүүхдүүдтэй, гэхдээ тэдний талаар маш бага зүйл мэддэг. Тэдний ээж хэн болохыг бид мэдэхгүй" гэж Хойд Солонгосоор мэргэшсэн шинжээч хэлэв. Гэхдээ тэрээр Ким Жу-Э-г олны ярьдагчлан Ким-ийн залгамжлагч болно гэдэгт итгэхгүй байгаа гэжээ.
Ким нас залуу хэвээр байгаа бөгөөд Ким Чен Уны хүчирхэг эмэгтэй дүү Ким Ё Жон илүү туршлагатай, элиттэй харилцаатай байгаа нь ахыгаа залгамжлах илүү магадлалтай нэр дэвшигч юм.
Хауэлл хэлэхдээ "Хойд Солонгосын удирдагч пуужин харвах, цайллага, хөл бөмбөгийн тоглолтын үеэр бага насны охинтойгоо хамт харагддаг нь түүнийг гэр бүлсэг хүн, нинжин сэтгэлтэй удирдагч гэж харагдуулах нэг боломж гэжээ.
4. Улс орон нь ийм ядуу байхад Ким Чен Ун яаж тансаг амьдарч чадаж байна вэ?
Хойд Солонгос цөмийн зэвсэг, баллистик пуужингийн хөгжүүлэлтийн улмаас НҮБ болон барууны орнуудын хатуу хориг дор олон жилийн турш амьдарсаар ирсэн.
Хауэллийн хэлснээр, Ким Чен Ун хориг арга хэмжээг тойрч гарахын тулд чадах бүхнээ хийж байна. Улс оронд тусгай дэглэмийн үед ашиглах зориулалттай сан бий. Ким өөрийгөө болон гэр бүлийнхээ тансаг амьдралын хэв маягийг хадгалахын тул энэ санг байлгахыг хүсдэг.
Түүнчлэн Хойд Солонгост мөнгө өгөхөд бэлэн улс орнуудын бүхэл бүтэн сүлжээ дэлхий дээр бий. Хойд Солонгос өөр хэлбэрээр мөнгө авч магадгүй.
Хүмүүс Хойд Солонгосыг интернетгүй, тусгаарлагдсан улс гэж боддог. Гэвч Хойд Солонгос төрийн өмчийн интернэттэй бөгөөд кибер дайн нь эдний хувьд чухал стратеги болсон. Кимийн дэглэм эдийн засаг, цөмийн хөтөлбөрөө дэмжихийн тулд, мөнгө хулгайлахын тулд бусад орны компьютерийн системд халддаг. Тэд энэ зорилгодоо тодорхой хэмжээгээр хүрч чаддаг.
5. Ким Чен Ун ард түмнийхээ төлөө санаа тавьдаг уу?
2020 оны цэргийн парадын илтгэл Хойд Солонгосын удирдагчийн өөр талыг харуулсан. Тэрээр тахал өвчин болон байгалийн гамшигтай тэмцэж буй цэргүүддээ талархал илэрхийлэв. Нэг удаа тэр улс орны хүндрэлийг ярьж байгаад нулимсаа арчиж байсан удаатай. Энэ бол Ким Чен Уны сэтгэл хөдлөлийн ховор үзүүлбэр юм.
Энэ үйлдлийг нь улс оронд нь эдийн засгийн хямрал нүүрлэж байгаа ийм үед түүнийг даруу зан гаргахыг хичээж байж магадгүй гэж зарим ажиглагчид үзэж байна. Гэхдээ сайн ажиглавал үүнийг нотлох баримт бага байна.
Ким Чен Ун өвөө Ким Ир Сений эхлүүлсэн тансаг галт тэргээр аялдаг уламжлалаа үргэлжлүүлж байна. 2001 онд Ким Чен Уны эцэг Ким Чен Ирийг аялалд дагалдан явсан Оросын цэргийн удирдагч Константин Пуликовский "Ориент экспресс" хэмээх дурсамж номондоо "Та орос, хятад, солонгос, япон, францын дуртай хоолоо захиалж болно. Амьд хавч, Парисаас авчирсан нэр алдартай Бордо, Бургунди дарсыг ч бас" гэж бичжээ.
БНАСАУ-ын иргэд нь хоол хүнс маш хомс, өлсгөлөнд нэрвэгдэж байна. Тус улсын нөхцөл байдал 1990-ээд оноос хойш тохиолдсон бүхнээс ч дор байгааг мэргэжилтнүүд хэлж байна.
Эх сурвалж: Toim.mn