Ногоон автобусны гэх хэргийг хуулийн байгууллагаас шалгаж дуусаад, яллах дүгнэлт үйлдүүлэх саналтайгаар прокурорын байгууллагад шилжүүлсэн гэдгийг АТГ-аас мэдээлсэн билээ. Тодруулбал, автобуснуудыг үйлдвэрийн технологийн бус аргаар угсарч хийгдсэн гэдгийг тогтоосон байна. Хохирол 134,5 тэрбум үүнээс мөрдөгчид 11,9 тэрбум төгрөгийг төлүүлж, 71,7 тэрбум төгрөгийн хөрөнгийг битүүмжлэн хамгаалсан байгаа юм.

Өнгөрсөн жил 800 ширхэг ногоон автобус оруулж ирэх гээд бүтэлгүйтсэн. Учир нь хаана үйлдвэрлэгдсэн нь тодорхойгүй эдгээр ногоон автобусыг хуулийнхан шалгаад хуучин, угсарсан гэдгийг нь олоод тогтоочихсон. Төсвийн хөрөнгөөр хуучин буюу актлагдсан автобуснуудыг будганд оруулаад цоо шинэ автобус мэтээр ойлгуулаад, нийтийн тээвэрт нийлүүлэх гэсэн нэр бүхий албан тушаалтнуудын арга заль тав алхахгүй баригдсан төдийгүй эрүүгийн гэмт хэрэгтнүүд ч болчихоод байгаа юм.

Одоогоор энэ хэрэгт нэр бүхий 27 хүнийг яллагдагчаар татан шалгаж байгаа юм. Тэгвэл тэдний нэг яах аргагүй гол буруутан бол "Тэнүүн-Огоо" компанийн захирал А.Ганхуяг юм. Асуудал үүсээд эхлэнгүүт хэтэрхий том байсан түүнийг хуулийнхан гэрээс нь баривчлаад 72 цаг саатуулаад суллаж байсан.

Тэрбээр баригдахынхаа өмнө хэвлэлийнхэнд мэдээлэл хийхдээ “Автобусны тухайд бол цоо шинэ. Будаг замасктай холбоотойгоор үйлдвэрийн алдаа гарсныг хүлээн зөвшөөрч байна. Тиймээс захиалагчийн хувьд “Шаардлага хангахгүй автобусаа буцааж тат” гэсэн шаардлагаа үйлдвэрлэгч компанид хүргүүлээд байна. Миний хувьд АТГ, цагдаагийн газарт өөрөө очиж шалгуулна. Манай компанийн дансаар орсон, гарсан санхүүгийн мэдээллийг бүгдийг шалгуулах болно. Хэрэв энэ автобус капитал засвар орсон, хуучин автобус байвал би хариуцлагаа бүрэн үүрнэ. Нийтийн тээврийг улстөржүүлж байна” гэж хэвлэлийн хурал хийгээд тэр шөнөө баривчлагдсан байдаг.

Тэгвэл эдгээр автобуснуудыг хуучин капитал засвар орсон гэдгийг хуулийнхан шалгаад нэгд нэгэнгүй тогтоочихлоо. Харин одоо ийм автобус оруулж ирэхэд улстөрийнхөнтэй хутгалдаж хуйвалдаж ашиг хонжоо хайсан буруутнуудад хуулийн хариуцлага хүлээлгэхээр боллоо. Өөрөөр хэлбэл, өөрийгөө өмөөрч байсан А.Ганхуяг бол ял хүлээх болзлоо хангачихжээ. Хэрхэн яаж шийдэж шүүхийг цаг хугацаа болон шүүхийн байгууллага харуулах болно.

Эх сурвалж: Toim.mn