УИХ-ын чуулганы өнөөдрийн хуралдаан үргэлжилж байна. Хөрөнгө оруулалтын тухай хуулийн шинэчилсэн найруулгатай холбоотойгоор гишүүд хууль санаачлагчаас асуулт асууж хариулт авч байна.

Эдийн засгийн хөгжлийн сайд Ч.Хүрэлбаатар "Хөрөнгө оруулалтын тухай хуулийг дагасан нэлээд их улстөржилт явагдаж байна. Улсаа хөгжүүлж, хүн амынхаа амьжиргааг дээшлүүлмээр байна. Монгол Улсын хөгжлийн хамгийн гол хөдөлгүүр бол хөрөнгө оруулалт. Хөрөнгө оруулалтыг нэмэгдүүлэхэд чиглэлд бүхий л арга хэмжээг хэрэгжүүлэх ёстой. Иргэд үүнийг хүсэж байна.

Ганцхан үг нийгэмд ямар өөрчлөлт авчирсныг бид харсан. Энэ бол бирж гэдэг үг. Биржийн хууль батлагдсаны дараа Монголын газрын доорх баялгууд үнэд хүрдэг болсон. Монгол Улсын валютын нөөц нэмэгдсэн. Улсын төсөв давж биелж байна. Эдийн засаг долоо орчим хувиар өсөх болж байна.

Монгол Улсын хуульд 30 жил байсан заалтыг гэв гэнэт Колумб Америк улсыг нээчихсэн юм шиг олж хараад Ч.Хүрэлбаатар газрыг 100 жилээр өгөх гэж байна гэсэн үлгэр зохиодог жишээ энэ танхимд л байна. 30 жил Монгол Улсын хуульд байсан заалт. Их үнэмшилтэйгээр жүжиглэж, хоолойгоо шахаж ярьж байгаа, нүднээс нь нулимс дуслуулан ярьж байгаа. Тэрбум тэрбум төгрөгөөр Монгол Улсыг харлуулдаг, хуваадаг, доромжилдгийг зогсоох цаг ирсэн. Хуучинтайгаа хоцрогдъё, Монгол Улсын өнөөдрийг хүртэл танкны үлгэрээр төсөөлж, хөгжлийг өнөөдрийг хүртэл хэдэн арван жил хойш татаж ирсэн хэсэг бүлэг хүмүүсийн гар хөл болж байгаа хүмүүс өнөөдөр энэ хуулийг эсэргүүцнэ. Энэ ажиллагаанд хэдэн тэрбум төгрөг зарцуулж, хүмүүсийг харлуулж байна" гэв.