2024 оны 1 сарын 12-нд Соёлын яамны санаачилгаар “Залуу монголч судлаачдын эрдмийн хэлхээ нийгэмлэг”-ээс зохион байгуулж буй “Монголчуудын угийн бичгийн соёл: уламжлал ба орчин үе” сэдэвт эрдэм шинжилгээний хурал МУИС-ийн Номын сангийн 502 тоот хурлын зааланд болов.

Тус эрдэм шинжилгээний хурлыг зохион байгуулагчдын зүгээс Монгол улсын төрөөс БНМАУ-ын Ерөнхийлөгчийн 1991 оны 115 дугаар зарлигийн хавсралт “БНМАУ-ЫН ХҮН АМ ЗҮЙН ТАЛААР БАРИМТЛАХ ЧИГЛЭЛ”, 2007 оны 10 дугаар сарын 3-ны өдөр Монгол улсын Засгийн газрын “Угийн бичиг хөтлөх журам”-ыг шинэчлэн батлах 257 дугаар тогтоол зэрэг маш олон баримт бичгүүд гарсан хэдий ч хөрсөн дээрээ хэрэгжих нь хангалттай бус байгаа нь анзаарагддаг. Тиймээс эл асуудалд нарийн судалгаатай хандах зайлшгүй хэрэгцээ шаардлага байна гэж үзэж байгаа ажээ.

Угийн бичиг хөтлөх нь нэг талдаа олон нийтийн дунд ач холбогдлын хувьд маш өндөр байж болох ч нөгөө талдаа хүн ам цөөн, нийгмийн ёс суртахууны төлөвшил хангалттай бус, хот хөдөөгийн хүн амын тооны тэнцвэрт харьцаа алдагдаж буй манай улсын хувьд ялгаварлан гадуурхалтын нэг шинэ хэлбэрийг үүсгэх эрсдэл байгааг ч тооцон авч хэлэлцэх ёстой гэв.