Хэсэг археологичид Амазоны ширэнгээс 2,000 жилийн өмнө оршиж байсан хотын туурийг илрүүлжээ.

Уг хотод хамгийн багадаа 10,000 тариачин амьдарч байсан гэж үзэж байна.

Өмнөд Америкийн Эквадор улсын нутагт харьяалагддаг ширэнгийн хэсгээс овоолсон шороо, арилсан замуудын ул мөрийг анх хорь гаруй жилийн өмнө Францын археологич Стефен Ростайн илрүүлж байжээ.

Гэвч хоорондоо ямар холбоотой зүйлс болох нь тухайн үед тодорхой бус байсныг Ростайн өчигдөр “Science” сэтгүүлд нийтлүүлсэн тайландаа бичсэн байна.

Харин саяхан орчин үеийн лазер мэдрэгчтэй зураглалын технологийн тусламжтай шинжилснээр эдгээр нь хоорондоо нягт холбоотой, нарийн дэд бүтэц байсныг олж тогтоожээ.

Андын нурууны бэлд орших энэ хот 1,000 орчим жил оршин тогтносон гэж дүгнэсэн байна.

Энэхүү хотод нийтийн тооллын өмнөх 500 оноос нийтийн тооллын 300-600 оны хооронд хүртэл хугацаанд Упаночууд сууж байжээ. Энэ нь Европ дахь Ромын эзэнт гүрний үетэй давхцах хугацаа юм.

6,000 гаруй шороон товцог дээр босгосон орон сууцнууд, барилгууд нь ус зайлуулах суваг бүхий тариалангийн талбайгаар хүрээлэгдэж байсан байна.

Гол гудамж нь 10 метр өргөн, 10-20 км урт үргэлжилж байсныг судлаачид тогтоожээ.

Хүн амыг нь тооцоолоход хэцүү ч хамгийн цөөндөө 10,000 хүн сууж байсан гэж үзэж байна. Дээд тал нь 15,000-30,000 хүрдэг байсан гэж дүгнэжээ.

Энэ нь тэр үеийн Британийн хамгийн том хот байсан Ромын захиргааны Лондонтой дүйцэх оршин суугчийн тоо гэнэ.

Амазоны ширэнгийг саяхан хүртэл цөөн хүнтэй овог аймгуудын амьдардаг зэлүүд бүс нутаг гэж үздэг байв.

Гэвч сүүлийн үеийн нээлтүүд энэ ойлголтыг өөрчилж байгаа.

Саяхан эрдэмтэд ширэнгийн Боливи, Бразилын хэсэгт Европчуудыг ирэхээс өмнө оршиж байсан нарийн зохион байгуулалттай суурин газруудын ул мөрийг илрүүлж байв.

“Амазонд гайхалтай олон янзын хүмүүс, хот суурингууд байсаар иржээ. Бид тэдгээрийн талаар дөнгөж судалж эхэлж байна” гэж судалгааг ахалсан Ростайн ярьжээ.

Эх сурвалж: Associated Press