УИХ-ын гишүүн Б.Энх-Амгалан, УИХ-ын дарга асан З.Энхболд нарт Эрүүгийн хуулийн тусгай ангийн 22.1 дүгээр зүйлийн 3 дахь хэсэгт заасан Эрх мэдэл, албан тушаалын байдлаа урвуулан ашиглах гэмт хэрэгт холбогдуулан Нийслэлийн Прокурорын газраас яллах дүгнэлт үйлдэж, Сүхбаатар дүүргийн Эрүүгийн хэргийн анхан шатны шүүхэд шилжүүлсэн.
Шүүхээс эрүүгийн хэргийн гэм буруутай эсэхийг тогтоох шүүх хуралдааныг 2023 оны 12 дугаар сарын 27-ны өдрийн 10 цагт товлон зарласан боловч шүүгдэгч Б.Энх-Амгалангийн өмгөөлөгч нараас “...Шүүх хуралдаанд нэр бүхий гэрч, иргэдийн төлөөлөгч нарыг оролцуулахаар шүүх хуралдааныг хойшлуулж өгнө үү...” гэх хүсэлт, мөн “...Миний үйлчлүүлэгч Б.Энх-Амгалан 2024 оны УИХ-ын үйл ажиллагааны төлөвлөгөөнд тусгагдсаны дагуу Улсын Их хурлын байнгын хорооны эрхлэх асуудлын хүрээнд Бүгд Найрамдах Солонгос улс руу албан томилолтоор явах шаардлагатай тул Б.Энх-Амгаланд урьд авсан хилээр гарахыг хязгаарлах хязгаарлалт тогтоох таслан сэргийлэх арга хэмжээг өөрчилж өгнө үү...” гэх хүсэлтийг, холбогдох баримтын хамт гаргасан.
Шүүх бүрэлдэхүүн өмгөөлөгч нарын хүсэлтүүдийг хэлэлцээд, хүлээн авах үндэслэлтэй гэж үзэн шүүх хуралдааныг 2024 оны 01 дугаар сарын 18-ны өдрийн 09 цаг хүртэл хойшлуулж, шүүгдэгч Б.Энх-Амгаланд авсан Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээг хүчингүй болгож, харин хувийн баталгаа гаргах таслан сэргийлэх арга хэмжээг хэвээр үргэлжлүүлж шийдвэрлэсэн байдаг. Өөрөөр хэлбэл, ирэх пүрэв гарагт тэдний гэм буруутай эсэхийг тогтоох шүүх хуралдаан эхлэх ёстой. Өнөөдрийн байдлаар тэд шүүх хурлаас мэдээлэл авна, юунд буруутгагдаад байгаагаа ч мэдэхгүй байна гэх мэдээлэл өгч буй.
