"Эрдэнэс Тавантолгой"-н 1072 хувьцааны ногдол ашгийг сар шинийн баяраас өмнө тарааж магадгүй гэсэн мэдээлэл гадуур тарж, мөн Төрийн ордонд яригдаж эхэлжээ. УИХ-ын чуулганы нэгдсэн хуралдааны үеэр УИХ-ын гишүүн Б.Пүрэвдорж сар шинийн баяраас өмнө иргэн бүрт 580 мянган төгрөгийн ногдол ашиг тараахыг шаардсан юм.
“Эрдэнэс Тавантолгой” ХК сүүлийн жилд гурван их наяд төгрөгийн цэвэр ашигтай ажиллажээ. Тиймээс иргэдэд ногдол ашиг тараах боломжтой. Үүнийг заавал сонгуулийн өмнө тарааж, улс төржилт хийх шаардлагагүй гэж АН-ын гишүүд үзэж буй. Харин энэ тал дээр Сангийн сайд Б.Жавхлан "Ногдол ашгийг иргэдэд зайлшгүй өгөх хэрэгтэй. Цаг хугацаа нь болж байгаа тул сонгуультай холбож улс төржүүлэх хэрэггүй.
“Эрдэнэс Тавантолгой” ХК-нд байсан далд хулгайг ил болгож, БЭТ томилсноор үр дүн нь гарч байна. 2023 оны жилийн эцсээр тайлан нь сайн гарсан байна. Тиймээс энэ онд ард иргэддээ ашгаа тараах хэрэгтэй" гэсэн юм. Тэгэхээр сонгуулийн өмнө үү, эсвэл цагаан сарын өмнө үү гэдэг нь тодорхойгүй ч ногдол ашиг тараахыг гишүүд болон сайд нь дэмжиж байгаа бололтой.
