УИХ-ын гишүүд болон сайд нарын зарим нь Хөрөнгө оруулалтын тухай хуулийн шинэчилсэн найруулгыг чуулганаар хэлэлцэхийг дэмжиж байгаа юм. Гэтэл энэ хууль нь чуулганы босго давж чадаагүй байдалтай байна. Учир нь АН-ынхан 5 хоногийн завсарлага авсан. Мөн Ерөнхийлөгч асан Х.Баттулга УИХ-ын даргад шаардлага хүргүүлсэн байдалтай байгаа юм.
Өнөөдөр Төрийн ордны баруун талд уг хуулийг эсэргүүцсэн иргэд болон иргэний нийгмийн байгууллагууд үг үзэл бодлоо илэрхийлж, жагссан байна. Харин энэ үеэр Төрийн ордон руу орж яваа сайд Б.Дэлгэрсайханаас Хөрөнгө оруулалтын хуулийг дэмжиж байгаа эсэхийг тодруулж, тайлбар авсан байна.
Монгол Улсын сайд, Улаанбаатар хотын авто замын түгжрэлийг бууруулах үндэсний хорооны дарга Б.Дэлгэрсайхан "Хууль нь хуучин хэрэгжиж байсан. Хөрөнгө оруулалтын тухай хуулийг дэмжиж байгаа шүү, шуудхан хэлэхэд. Дэмжиж байгаа. Яагаад гэвэл Монгол Улс хөгжих ёстой биздээ" хэмээн бухимдлаа илэрхийлжээ.